29
1 Muntu oghu bakusoghosagha bhaatu aakala anali ntaaghu̱wa,
akuhwelekeelela bwangu.
2 Bantu balungi bakaakulemagha bantu badheedhuwa,
bhaatu babhi mbaalema bantu batuntula.
3 Oghu abbali̱ye magheji akudheedhagha ese wee,
bhaatu oghu akwehaagha baamalaaya aku̱bhi̱i̱yagha etungo liye.
4 Mukama oghu ali na bwengani̱ja ehanga liye likuteekaanagha,
bhaatu oghu abbali̱ye ngu̱ji̱ ali̱hwelekeeleli̱ya.
5 Muntu oghu akusindilila muliilanuwa wee,
akuba naamuteghela ki̱ki̱ya.
6 Muntu mubhi akukwatiluwagha mu kibhi kiye,
bhaatu muntu mulungi akuukalagha naalimba kandi adheedheeu̱we.
7 Muntu mulungi akufuwaaghʼo bughabe bwa banaku,
bhaatu muntu mubhi taakufuwaaghʼo bbaa.
8 Bantu baa mighayo bakuleetagha nsi̱si̱ mu kibugha,
bhaatu baa magheji bakeehi̱yʼo bantu ki̱i̱ni̱gha.
9 Muntu mugheji akaakunyegheelelagha mudhoma,
mudhoma akusaaliluwagha, atandika kumwambula kandi hatabʼo bu̱si̱nge.
10 Baji̱ndi̱ bakwohagha bantu abatali na musango,
bhaatu bantu balungi balengʼo kubakoonela.
11 Muntu mudhoma akwolekagha ngoku asaaluuwe,
bhaatu mugheji aku̱gu̱mi̱si̱li̱jagha kandi eelinda.
12 Mu̱lemi̱ naategheleei̱ye bisubha,
banyolo be boona bakuba bantu babhi.
13 Munaku na muntu oghu akumubona-boni̱ya bali nʼeki basusaanʼo,
bombi Mukama niiye akulekagha babona.
14 Mukama naanatwi̱li̱i̱ye munaku musango mu bwengani̱ja,
akulema bwile bukani̱ye.
15 Kukutula mwana noomuhana kikuleka abe mugheji,
bhaatu kumuleka kukola ebi abbali̱ye kikuhemulagha ni̱na wee.
16 Bantu babhi bakaakulemagha misango yeeyongela,
bhaatu bantu balungi bakubona kughuwa kwa bantu aba.
17 Nuwaahani̱ye baana baawe,
bakukuha bu̱si̱nge kandi odheedhuwe.
18 Luhanga atahikiiye ehanga, talikuteekaana,
bhaatu abaku̱hu̱ti̱ya bilaghilo biye bakudheedhuwa.
19 Bighambo byonkaha tabikugubha kuhana mu̱heeleli̱ya,
nankabha eetegheeleli̱ya, taakufuwʼo.
20 Mudhoma asaai̱ye muntu
oghu aku̱bu̱ghagha atadhu̱bhi̱ye kweli̱li̱kana.
21 Kaakuba oha mu̱heeleli̱ya waawe bu̱li̱ kintu ku̱lu̱gha mu bwana,
kilo kimui alitwala ebyawe byona.
22 Muntu wa ki̱i̱ni̱gha akuleetagha kutongana
kandi oghu asaakaaye akola kibhi kya bu̱li̱ mulingo.
23 Myepanko ya muntu ekulekagha ahemuka,
bhaatu mu̱dhooti̱ baku̱mu̱hu̱ti̱yagha.
24 Oghu akukolangana na musuma,
akuba oohi̱ye bwomi̱i̱li̱ buwe,
nankabha bamulahi̱li̱ya, taaku̱bu̱gha majima.
25 Oghu akwobaha bantu akweleetela bijibu,
bhaatu oghu eesi̱ghi̱ye Mukama akuba na bu̱si̱nge.
26 Bantu bakani̱ye bakubbalalgha mu̱lemi̱ kubaghilila kisa,
bhaatu Mukama enkaha niiye akughililagha muntu bwengani̱ja.
27 Bantu bahi̱ki̱li̱i̱ye boohi̱ye bantu babhi
kandi babhi booha bahi̱ki̱li̱i̱ye.