30
Bighambo bya Agula
1 Bighambo bya Agula mutabani̱ wa Yaake.
Musaasa oghu aaghila ati, “Ai̱ Luhanga, naalu̱hi̱ye,
Ai̱ Luhanga naalu̱hi̱ye, maani̱ ghampooye.
2 Majima ni̱i̱si̱ye muntu asaai̱ye boona kuba mudhoma,
tandi na magheji nga ghaa bantu.
3 Tankeeghagha kuba mugheji
kandi tanimani̱yʼo Luhanga oghu Ahi̱ki̱li̱i̱ye.”
4 Ni ani̱ akani̱i̱na mu eghulu kandi atodha aasu̱ndu̱ka hansi?
Ni ani̱ akakumaani̱ya mpwegha kandi aaghikwata mu ngalo siye?
Ni ani̱ akaboha maasi mu kyaku̱lu̱waala kiye?
Ni ani̱ akatʼo mitaano ya nsi?
Li̱i̱na liye niiye ani̱? Kandi li̱i̱na lya mwana wee niiye ani̱?
Ongambile olakaba oghamani̱ye!
5 Bu̱li̱ kighambo kya Luhanga nkyamajima.
Niiye ngabo ya abakumuulukilaghʼo.
6 Otalyongela haa bighambo biye,
nanga asaaliluwa naawe kandi ooleka ngoku oli wa bisubha.
7 Ai̱ Luhanga, ndimakusaba
kumpa bintu bibili ntakaku̱u̱ye.
8 Onkoonele kutadimaaga bantu kedha kuha bisubha
kandi otanfoola munaku munu kedha muguudha munu,
bhaatu ompaaghe byokuliya ebi nkwetaaghisibuwa.
9 Ninaabaaye muguudha munu,
nkugubha kukughaya kandi ngile nti, “Mukama ni ani̱?”
Ai̱ Luhanga wanje, ninaabaaye munaku munu,
nkugubha kwibha kandi ndeke baghaye li̱i̱na lyawe.
10 Otali̱bu̱ghʼo kubhi mu̱heeleli̱ya ewaa mukama wee,
nanga mu̱heeleli̱ya oghu akukukiina kandi obona-bone.
11 Haliyo bantu abakukiinagha beesebo
kandi batasabila baani̱nabo kuba kulungi.
12 Haliyo bantu abakweli̱li̱kanagha bati tabali na nsobi̱
kandi kuni banali na bibhi ebi bakwete kukola.
13 Haliyo bantu abakweli̱li̱kanagha bati mbalungi munu,
kusaali̱ya banji boona.
14 Haliyo bantu abakusaakalagha kuuyʼo banaku nʼabali mu bwetaagho bintu,
niikuwo beetungile ebikubaakali̱yʼo.
15 Wamusundo ali na bahala be babili,
bakughilagha bati, “Ompe! Ompe!”
Haliyo bintu bisatu kedha bbinaa ebitaakuukutagha:
16 eku̱li̱mu̱, mukali̱ ngumba,
etaka lyomi̱ye elitalimu maasi
kandi mulilo ghwamaani̱.
17 Oghu akulola ese wee na maaso ghaa mighayo
kandi abhenga ku̱u̱ghu̱wa ni̱na wee,
abhonganuuwe binamungoogha kumuuyamu maaso agha
kandi aliibuwe bi̱noni̱ ebikuliyagha mi̱ku̱.
18 Haliyo bintu bisatu kedha bbinaa,
ebikunswekani̱yagha ku̱byetegheeleli̱ya:
19 ngoku kibebe kikuhalalagha mu mwanya,
ngoku njoka ekukwamilagha haa kikuka,
ngoku bwati̱ bukutungagha kihanda haa nanja namu̱li̱to
kandi ngoku musaasa na mukali̱ bakukundanganagha.
20 Mukali̱ mu̱syani̱ niikuwo akukolagha atiyo,
akaakumalagha ku̱syana,
aghenda anaaba kandi eeli̱li̱kana ati,
“Tandi nʼeki naasobeei̱ye.”
21 Haliyo bintu bisatu kedha bbinaa ebi̱ku̱tu̱ku̱mi̱li̱yagha nsi
kandi ebi bantu baa munsi bataakugubha ku̱gu̱mi̱si̱li̱ja:
22 Mu̱syana kufooka mukama,
mudhoma kuba na byona akubbala kuliya.
23 Mukali̱ boohi̱ye kusweluwa
kandi mu̱heeleli̱ya wabukali̱ kutwala ki̱i̱kalo kya mukama wee.
24 Haliyo bintu bbinaa munsi biinabwana,
bhaatu bili na magheji ghakani̱ye.
25 Nkubebe, tasili na maani̱,
bhaatu sikwebiikilagha byokuliya mu bwile bwa kyanda.
26 Nsi̱mba, tasili na maani̱,
bhaatu sikukolagha maka ghaasiyo mu bikuka.
27 Njighe tasili na mukama,
bhaatu sikughendelagha mu lai̱ni̱.
28 Kiisitumbu, wangukikwata mu ngalo,
bhaatu kikutaahagha mu bikaali bya bakama.
29 Haliyo bintu bisatu kedha bbinaa,
ebi muntu akubbalagha kubona ngoku bikulubhatanga:
30 ntale eghi eli na maani̱ kusaali̱ya bisolo byona
kandi eghi etoobahi̱ye kintu kyona.
31 Ntu̱u̱li̱ ya nkoko eghi ekughendagha yeeghonji̱ye,
ntu̱u̱li̱ ya mbu̱li̱ eghi ekughendagha ehikiiye siinakyayo
kandi mukama oghu akughendagha ahikiiye mahe ghe.
32 Okaakuba nuwaabaagha mudhoma kandi nuweepanka,
kedha nootegheka kukola kintu ki̱bhi̱i̱hi̱ye,
oleke kandi weeli̱li̱kane!
33 Nanga nuwaami̱ghi̱ye mata okuuyamu magita.
Nuwaahuuye muntu muhuli, saghama ekutuwamu
kandi nuwaasaali̱i̱je muntu, hakubʼo kutongana.