31
Kuhabula mukama
1 Bini niibiyo bighambo ebi ni̱na mukama Lemweli̱ aamwegheeseei̱ye.
2 Mwana wanje, nkaku̱byala kandi nku̱ku̱ndi̱ye.
Nkasaba Luhanga kandi aakumpa.
3 Otamalila maani̱ ghaawe ghoona mu bakali̱,
nanga baahwelekeleei̱ye bakama.
4 Lemweli̱, otegheeleli̱ye.
Takili kilungi bakama kunuwa vi̱i̱ni̱
kandi taki̱hi̱ki̱ye balemi̱ kunuwa walagi̱.
5 Bakaakughinuwaagha baabululuwa bilaghilo
kandi batakolela banaku ebi̱hi̱ki̱ye.
6 Maaluwa ni ghaa bantu abalimaku̱wa,
na bantu abali mu busaali̱ji̱ bwamaani̱.
7 Aba banuwe niikuwo baabululuwe bunaku bwabo
kandi batatodha kuusuka bijibu byabo.
8 Obu̱ghi̱i̱li̱le abatakugubha kwebu̱ghi̱i̱li̱la
kandi olinde bughabe bwa abatali na bu̱kooneli̱.
9 Obu̱ghaghe kandi otwi̱laghe bantu misango mu bwengani̱ja.
Ololaghe ngu banaku na abali mu bwetaagho baatunga bughabe.
Mukali̱ wa ngeso sisemeeye
10 Ni ani̱ akugubha kutunga mukali̱ wa ngeso sisemeeye?
Mukali̱ oghu asaai̱ye kwonini mabaale ghaa muhendo.
11 Bali̱i̱ wee akumwesighagha
kandi musaasa oghu taaliba munaku.
12 Mukali̱ oghu mu bwomi̱i̱li̱ buwe bwona, akukola kulungi eba wee
kandi taakumukolʼo kabhi koona.
13 Akuukalagha atu̱ngu̱u̱taane,
naasona ngoye adheedheeu̱we.
14 Akuleetagha e ka byokuliya ku̱lu̱gha hambali haseli̱ye,
ngoku maati̱ ghaa basu̱u̱bu̱li̱ ghakukolagha.
15 Akuumukagha nkyambisi cu̱i̱-cu̱i̱ kuteekani̱li̱ja bantu be byokuliya.
Aaghambila baheeleli̱ya be baabukali̱ ebi bakukola.
16 Akubonagha musili aghughula
kandi akoleesi̱ya sente siye kuhelamu mi̱jaabbi̱i̱bbu̱.
17 Ni mukali̱ wamaani̱ mukoli̱
kandi akwekambagha kukola na mikono yee.
18 Amani̱ye mughaso ghwa ebi akukolagha
kandi akukolagha na mukilo abhaki̱i̱ye taala.
19 Aku̱koleesi̱yagha mahu̱u̱ji̱ ghe
kandi akoleesi̱ya mikono yee kwekolela ngoye.
20 Akuhaagha na mikono yee banaku,
na abali mu bwetaagho.
21 Taakufuwaaghʼo mu bwile bwa mpeu,
nanga bantu baa ka yee baku̱lu̱walagha ebikubatu̱u̱mi̱ya.
22 Akwekolelagha eenini bya kwala haa bulili buwe
kandi alu̱waala ngoye sya papo sisemeleeye kimui.
23 Bali̱i̱ wee baku̱mu̱hu̱ti̱yagha
akaakusitamagha mu lukulato lwa beebembeli̱ baa kibugha.
24 Mukali̱ oghu akukolagha ngoye kandi mi̱ci̱pi̱,
abi̱ghu̱li̱ya basu̱u̱bu̱li̱.
25 Akubaagha wamaani̱ kandi oghu bahu̱ti̱i̱ye,
taakwobaagha ebikubʼo mu maaso.
26 Aku̱bu̱ghagha bya magheji
kandi ahanuulila na kisa.
27 Akuloleelelagha baa ka yee
kandi taakubaagha mughala.
28 Baana be baku̱mu̱si̱i̱magha
kandi bali̱i̱ wee amusinda.
29 Akughilagha ati, “Bakali̱ bakani̱ye bakukolagha bintu bisemeeye,
bhaatu uwe obasaai̱ye boona.”
30 Kusemela kwa mukali̱ haagu̱u̱li̱ kukudimaagagha,
bhaatu oghu ahu̱ti̱i̱ye Mukama niiye babhonganuuwe kusinda.
31 Mukali̱ oghu omuhe mpeela haabwa ebi aakoli̱ye
kandi omusindile mu bantu bakani̱ye haabwa ebi akukolagha.