Dhaneeli̱
Kwanjula
Kitabo kini kikahandiikuwa mulangi̱ Dhaneeli̱ haai mu mwaka ghwa bi̱ku̱mi̱ bitaano na maku̱mi̱ asatu nʼetaano Ki̱li̱si̱to atakabyauwe. Akakihandiika bwile obu aabaagha mu kibugha kya Bbabbu̱looni̱ haanu̱ma ya Ku̱u̱lo mukama wa Paasiya kukwata kibugha eki mu mwaka ghwa bi̱ku̱mi̱ bitaano maku̱mi̱ asatu na mwenda Ki̱li̱si̱to atakabyauwe.
Dhaneeli̱ hamui na Bayu̱daaya baanakiye banji bakabakwatila mu kibugha kya Yelusaalemu kandi baabatwala mu kikaali kya Nebbukadeneeja mukama wa Bbabbu̱looni̱. Dhaneeli̱ baamufoola omui haa balemi̱ bakulu mu bukama bwa Bbabbu̱looni̱ nanga akaba asemeeye, eetegheleei̱ye kandi Luhanga amuhaaye magheji ghaa kusoboolola ndooti̱.
Kitabo kini ki̱bu̱ghi̱yʼo mbeela esi Dhaneeli̱ na baabhootu̱ siye baasaaliiyemu mu bukama bwa Bbabbu̱looni̱ hansi ya bu̱lemi̱ bwa bakama bani: Nebbukadeneeja, Bbeli̱saja na Dhaaliyo. Dhaneeli̱ aagubhagha kusoboolola ndooti̱ na ebikughenda kubʼo.
Mu kitabo kini Dhaneeli̱ ooleki̱ye ngoku Luhanga alemi̱ye bu̱li̱ kintu kandi ngoku akugubha ku̱koleesi̱ya bantu na mahanga kukola ebi abbali̱ye. Ooleki̱ye ngoku bakama bakugubha kubʼo, kuhuwʼo, ngoku Luhanga alemi̱ye bwile bwona kandi kukwama mu Masiya, aku̱si̱ngu̱lagha bantu babhi abali munsi kandi ajuna abamwesi̱ghi̱ye.
1
Dhaneeli̱ na baabhootu̱ siye
1 Mu mwaka ghwakasatu ghwa bu̱lemi̱ bwa Yehoyaki̱i̱mu̱ mukama wa Bu̱yu̱daaya, Nebbukadeneeja mukama wa Bbabbu̱looni̱ aasa na baasilikale be kandi beeli̱ghi̱i̱li̱li̱ya kibugha kya Yelusaalemu ku̱ki̱lu̱mba. 2 Mukama aaleka Nebbukadeneeja aasi̱ngu̱la Yehoyaki̱i̱mu̱ mukama wa Bu̱yu̱daaya kandi aatwala bimui haa bintu ebyabaagha mu numba ya Luhanga. Bintu ebi aabitwala Babbu̱looni̱ kandi aabibiika mu sitoowa ya numba ya luhanga wee.
3 Niibuwo Nebbukadeneeja aalaghiiye Asipenaji̱, mukulu wa baheeleli̱ya bʼomu kikaali kiye, kumuleetela bamui haa basaasa Banai̱saaleeli̱ aba baahi̱ye mu Bbabbu̱looni̱, abalu̱ghi̱ye mu ka ya mukama wa Bu̱yu̱daaya na maka agha bantu bahu̱ti̱i̱ye. 4 Mukama Nebbukadeneeja aabbalagha batabhana abali na maani̱ kandi abatali na kamogo haa mubili. Abasemeeye kandi abali na magheji, abakugubha kwegha kandi kwetegheeleli̱ya bintu bwangu. Bakulaghiluwa kuba abakugubha ku̱heeleli̱ya mu kikaali kya Mukama Nebbukadeneeja kandi kwegha mu̱bu̱ghe na mpandiika ya Bakaladi̱ya.*1:4 Bbai̱bbu̱li̱ sinji sighambi̱ye Banabbabbu̱looni̱kandi kikaba kili ki̱bbu̱la kya bantu abamanu̱u̱we haabwa kuba na magheji ghaa bu̱ku̱mu̱ kandi kusoboolola ndooti̱. 5 Mukama oghu aalaghila ati bu̱li̱ kilo babahaaghe haa byokuliya bisemeeye ebi akuliyaagha kandi haa vi̱i̱ni̱ eghi akunuwaagha kandi babatendeke haabwa myaka esatu, haanu̱ma yʼeki babaleete mu kikaali kiye ku̱mu̱heeleli̱ya.
6 Mu batabhana aba hakaba halimu Dhaneeli̱, Hananiya, Misai̱li̱ na Ajaaliya, bʼomu ntu̱la ya Yu̱da. 7 Asipenaji̱, mukulu wa baheeleli̱ya, aabaluka mali̱i̱na ghanji: Dhaneeli̱ aamughilamu Bbeli̱tesaja, Hananiya aamughilamu Sedulaaka, Misai̱li̱ aamughilamu Mi̱saaki̱ kandi Ajaaliya aamughilamu Bbeneneego.
8 Bhaatu Dhaneeli̱ aatu̱wamu ku̱teebhi̱i̱ya kuliya kandi kunuwa vi̱i̱ni̱ eghi mukama aabahaaye. Aasaba mukulu wa baheeleli̱ya oghu ku̱mu̱si̱i̱mi̱lani̱ya kutaliya haa byokuliya ebi. 9 Luhanga aaleka mukulu wa baheeleli̱ya oghu aakunda kandi aaghilila kisa Dhaneeli̱. 10 Bhaatu mukulu wa baheeleli̱ya oghu aaghila Dhaneeli̱ ati, “Noobahi̱ye mukama wanje, nanga niiye aalaghiiye byokuliya ebi mukuliya kandi vi̱i̱ni̱ mukunuwa. Mukama oghu kaakuba abona mwolobi̱ye kusaali̱ya batabhana baanakyanu banji, akugubha kunjita.”
11 Dhaneeli̱ aaghila mu̱li̱ndi̱ oghu mukulu wa baheeleli̱ya aataayʼo kuloleelela eye, Hananiya, Misai̱li̱ na Ajaaliya ati, 12 “Gutu olengese etu̱we baheeleli̱ya baawe haabwa bilo eku̱mi̱, otuhe bulaala bwonkaha haaliibuwo twaliyagha na maasi ghaa kunuwa. 13 Bilo eku̱mi̱ bikaakuhuwʼo, olole ngoku tukuba tu̱su̱si̱ye kandi ngoku batabhana abaliyagha haa byokuliya bya mukama bakuba basu̱si̱ye. Du̱mbi̱ obe na ntu̱wamu kusighikila ngoku oboone.” 14 Mu̱li̱ndi̱ oghu aaghu̱wa ebi Dhaneeli̱ aabu̱ghi̱ye kandi aabalengesa haabwa bilo eku̱mi̱.
15 Obu bilo eku̱mi̱ byahooyʼo, batabhana bbanaa aba boona bakaba basemeleeye kimui kandi bali na maani̱ kusaali̱ya batabhana banji abaaliyagha haa byokuliya bya mukama. 16 Ku̱lu̱gha bwile obu, mu̱li̱ndi̱ oghu atandika kubaha bulaala bwonkaha mu ki̱i̱kalo kya byokuliya na vi̱i̱ni̱ ebi aahaagha batabhana banji.
17 Luhanga aaha magheji batabhana bbanaa aba, baagubha kwegha kandi kwetegheeleli̱ya byona ebi baabeegheesi̱yagha. Dhaneeli̱ aatunga maghenji ghaa kusoboolola makulu ghaa kubonekeluwa kandi ndooti̱.
18 Obu bwile bwa kutendeka batabhana aba bwahooyʼo ngoku mukama aalaghiiye, du̱mbi̱ mukulu wa baheeleli̱ya aatwala batabhana aba ewaa Mukama Nebbukadeneeja. 19 Mukama oghu aabu̱gha nabo kandi aabona ngu taaliyo mutabhana onji oghu ali na magheji nga ghaa Dhaneeli̱, Hananiya, Misai̱li̱ na Ajaaliya. Du̱mbi̱ baafooka baheeleli̱ya baa mukama oghu. 20 Mu bu̱li̱ kintu ekikwetʼo magheji kedha kwetegheeleli̱ya eki mukama aabu̱u̱li̱yagha batabhana aba, aabonagha basaai̱ye milundi eku̱mi̱ banamaaje na baku̱mu̱ bʼomu bukama buwe bwona.
21 Dhaneeli̱ aakala mu kikaali eki ku̱hi̱ki̱ya haa mwaka ghwʼoku̱du̱bha ghwa bu̱lemi̱ bwa Mukama Ku̱u̱lo.
*1:4 1:4 Bbai̱bbu̱li̱ sinji sighambi̱ye Banabbabbu̱looni̱kandi kikaba kili ki̱bbu̱la kya bantu abamanu̱u̱we haabwa kuba na magheji ghaa bu̱ku̱mu̱ kandi kusoboolola ndooti̱.