Kitabo kya
JABBU̱LI̱
Kwanjula
Kitabo kya Jabbu̱li̱ kini ni bilimbo kandi nsaala ebi bantu baakumaani̱i̱ye. Mu mu̱bu̱ghe ghwa Luhebbulaayo, kighambo jabbu̱li̱ kikumani̱i̱si̱ya “kilimbo kya kusinda.” Majima jabbu̱li̱ sikani̱ye ni bilimbo hambali basi̱ndi̱ye Luhanga, bhaatu haliyo dhee jabbu̱li̱ sya milingo enji. Jabbu̱li̱ sinji ni nsaala sya kusaba bu̱kooneli̱ ewaa Luhanga, sinji ni kulila okwoleki̱ye kusaaliluwa kukani̱ye. Jabbu̱li̱ sinji ni bilimbo bya kusinda mukama wa I̱saaleeli̱. Sinji syaba bilimbo bya kwegheesi̱ya bantu haa magheji kandi ebi Luhanga akubbalagha, na binji nʼebinji.
Kitabo kya Jabbu̱li̱ kikahandiikuwa bantu bakani̱ye kandi kyamala myaka ekani̱ye kukilungani̱ya hamui. Simui haa jabbu̱li̱ ni sya hambele, sikahandiikuwa mu bwile obu Mukama Dhau̱dhi̱ aabaaghʼo. Majima, Bbai̱bbu̱li̱ ebu̱ghi̱ye ngoku Dhau̱dhi̱ aahandi̱i̱ki̱ye sikani̱ye haa jabbu̱li̱ sini. Sinji sikahandiikuwa haanu̱ma ya bantu baa I̱saaleeli̱ ku̱lu̱gha mu ehanga lya Bbabbu̱looni̱ hambali baabaagha babakwete kandi babatwete nga banyankomo. Basomi̱ baa Bbai̱bbu̱li̱ baku̱hi̱ki̱li̱jagha ngu kukumaani̱ya jabbu̱li̱ sini kukahuwʼo myaka bi̱ku̱mi̱ bbinaa kedha bisatu Ki̱li̱si̱to atakaasi̱ye. Kitabo kini kili na jabbu̱li̱ 150 esi batambulani̱i̱yemu bitabo bitaano biinabwana.
Nankabha jabbu̱li̱ sini sili bilimbo kedha nsaala, sikahandiikuwa mu mulingo ghwa mbaghani̱ja. Kyakulolelʼo, lukaala lukubaaghamu lai̱ni̱ ebili. Lai̱ni̱ yʼoku̱du̱bha eku̱bu̱ghaghʼo kintu kandi lai̱ni̱ yaakabili ekukuukaghamu neesoboolola ku̱ki̱gu̱mi̱ya.
Kitabo kya Jabbu̱li̱ ni kimui haa bitabo ebi bantu bamani̱ye munu kandi ebi baabbali̱ye mu bitabo ebili mu Bbai̱bbu̱li̱. Banai̱saaleeli̱ baasi̱koleesi̱yagha mu kulami̱ya kandi nʼendindi bantu baku̱si̱koleesi̱yagha. Jabbu̱li̱ si̱ku̱twegheesi̱yagha mulingo ghwa kusaba kandi kusinda Luhanga wa Eghulu Munu. Jabbu̱li̱ ya 23 ekuleetelelagha bantu bakani̱ye abatuntuuye kuhuumula. Jabbu̱li̱ ya 51 yaaleki̱ye bantu bakani̱ye baatula bibhi byabo ewaa Luhanga. Jabbu̱li̱ ya 110 eku̱gu̱mi̱yagha kandi eha bantu kunihila nanga ekulangililagha kwisa kwa Masiya oghu akuba mukama kandi mu̱hongi̱.
KITABO KYʼOKU̱DU̱BHA
1
(Jabbu̱li̱ 1—41)
Babhi na balungi
1 Ali na mu̱gi̱sa muntu
oghu ataakughendagha mu kuhanuula kwa bantu babhi,
kedha kwemilila mu kihanda kya basi̱i̱si̱,
kedha kuukala hamui na bakughayagha Luhanga.
2 Bhaatu adheedhuwa ku̱hu̱ti̱ya bilaghilo bya Mukama
kandi abyeli̱li̱kanʼo mukilo na ntangaali̱.
3 Ali nga kiti baheli̱ye haakpengbu̱ ya maasi,
ekikwanagha bi̱ghu̱ma mu bwile busemeeye bwonini
kandi eki mababi ghaakiyo ghataakwomagha.
Bu̱li̱ kintu kyona eki akukola, akukitungamu mu̱gi̱sa.
4 Bhaatu bantu babhi tabasu̱si̱ye batiyo bbaa,
bali nga bisunga ebi mpwegha eku̱hu̱ngi̱yagha.
5 Nahabweki bantu babhi Luhanga alibatwi̱la musango
kandi basi̱i̱si̱ tabaliikala hamui na bahi̱ki̱li̱i̱ye.
6 Mukama amani̱ye kihanda kya bahi̱ki̱li̱i̱ye,
bhaatu bantu babhi bali mu kihanda kya kuhwelekeelela.