2
Mu̱lemi̱ oghu akakomuwa Mukama
1 Haabwaki mahanga ghasaaluuwe,
na bantu mbahanuula ebitali na mughaso?
2 Bakama baa munsi beeteekani̱i̱je kulwana,
na balemi̱ niibuwo baahanuula hamui
kuhakani̱ya Mukama
kandi nʼoghu aakomi̱ye aaseesʼo magita.*2:1-2 Bikoluwa 4:25-26
3 Bakughilagha bati, “Oleke tu̱tu̱wakake njeghele syabo
kandi twefoole baa bughabe.”
4 Bhaatu Mukama oghu asitami̱ye mu eghulu akubasekeelelagha.
Akughayagha ntegheka syabo esitali na mughaso.
5 Ali̱bu̱gha nabo na ki̱i̱ni̱gha,
aboobahi̱i̱li̱li̱ye na ki̱i̱ni̱gha kiye kyamaani̱, naaghila ati,
6 “Haa mwena ghwanje ghu̱hi̱ki̱li̱i̱ye Sayu̱u̱ni̱,*2:6 Sayu̱u̱ni̱ ni li̱i̱na linji lya kibugha Yelusaalemu.
niiyo naataaye Mukama oghu naakomi̱ye.”
7 Nkubaghambila kilaghilo eki Mukama andaghiisani̱i̱ye ati,
“Nuuwe Mwana wanje,
ti̱ obwalo naafooki̱ye so waawe.
8 Onsabe, nkukuha mahanga kuba bugwetuwa bwawe,
nkukuha nsi yoona kuba etungo lyawe.
9 Okubalemi̱ya mwi̱gho ghwa kyoma
kandi obakpeetaagule nga minagha yʼebumba.”
10 Nahabweki enu̱we bakama, mube na magheji,
enu̱we balemi̱ baa munsi, muhabuluwe.
11 Mu̱heeleli̱ye kandi mu̱hu̱ti̱ye Mukama
kandi mudheedhuwe nimutukumila.
12 Mu̱teeli̱ye Mwana wee mu maghulu,
niikuwo atakwatuwa ki̱i̱ni̱gha
kandi muhwelekeelelela mu kihanda.
Eye akukwatuwagha ki̱i̱ni̱gha bwangu-bwangu.
Bali na mu̱gi̱sa boona abakumuulukilaghʼo.