5
Kusaba Luhanga kutukoonela
Ewaa mukulu wa bilimbo, naakoleesi̱ya ndele. Jabbu̱li̱ ya Dhau̱dhi̱.
1 Ai̱ Mukama, ooghu̱we kusaba kwanje,
otegheeleli̱ye kwehu̱mi̱ya kwanje.
2 Ai̱ Mukama wanje kandi Luhanga wanje,
ooghu̱we si̱ye oghu nkwete kutakangana kunkoonela,
nanga nuuwe nkusabagha wenkaha.
3 Ai̱ Mukama oku̱nji̱ghu̱wagha obu nkukusabagha nkyambisi,
bu̱li̱ nkyambisi nkukughambilagha byetaagho byanje
kandi ndindilila uwe kunkuukamu.
4 Tooli Luhanga oghu aku̱si̱i̱magha bubhi.
Bantu babhi tabakugubha kuukala naawe.
5 Taaliyo muntu wa myepanko oghu akugubha kwemilila mu maaso ghaawe
kandi woohi̱ye bantu babhi.
6 Mukama oku̱hweleekeeleli̱yagha bahi̱ baa bisubha,
toobbali̱ye bantu abakwitagha baanakyabo
kandi abatali na majima.
7 Bhaatu si̱ye, haabwa kukunda kwawe kwamaani̱,
nkutaaha mu numba yaawe
kandi nteeli̱ye, nkulami̱li̱ye mu Numba yaawe
nku̱hu̱ti̱li̱i̱ye kimui.
8 Ai̱ Mukama, onkwami̱ye mu kihanda kyawe ki̱hi̱ki̱li̱i̱ye,
ongu̱bhi̱i̱si̱ye kukenga njegheesi̱ya yaawe,
nanga ngi̱ghu̱ syanje bansi̱ngu̱la.
9 Tabaku̱bu̱ghagha majima bbaa.
Ebo bakubbalagha ku̱hwelekeeleli̱ya.
Mimelo yabo yaasami̱ye nga kituulo.
Kanu̱wa kaabo kaasuuyemu bisubha byonkaha.
10 Ai̱ Luhanga obasi̱ngi̱i̱si̱ye musango,
oleke ebi bakuhanuulagha aaniibiyo byabahwelekeeleli̱ya.
Obabhinge mu maaso ghaawe haabwa bikoluwa byabo bi̱bhi̱i̱hi̱ye,
nanga bakakujeemela.
11 Bhaatu oleke boona abakumuulukilaghʼo badheedhuwe,
oleke baakalaghe mbakulimbila badheedheeu̱we.
Olwanililaghe abaku̱ku̱ndi̱ye niikuwo beeghonje haabwawe.
12 Ai̱ Mukama, nuuwe majima okuhaagha mu̱gi̱sa bantu bahi̱ki̱li̱i̱ye,
nuuwe okubalindagha na kisa kyawe nga ngabo.