20
Nsaala ya mukama kuba mu̱si̱ngu̱li̱
Ewaa mukulu wa bilimbo. Jabbu̱li̱ ya Dhau̱dhi̱.
1 Mukama akukuukemu obu okuba oli mu bijibu,
Luhanga wa Yakobbo akulinde.
2 Luhanga oghu akutumile bu̱kooneli̱ ku̱lu̱gha mu ki̱i̱kalo kiye ki̱hi̱ki̱li̱i̱ye
kandi akuhe maani̱ ku̱lu̱gha Sayu̱u̱ni̱.
3 Asi̱i̱me bisembo byawe byona
kandi aasuke bihonguwa byawe byokeei̱ye.
4 Akuhe ebi mutima ghwawe ghukwete kubbala
kandi aleke ebi okwete kutegheka byona bibʼo.
5 Du̱mbi̱ tu̱ku̱bu̱gha nʼelaka lyamaani̱ tu̱dheedheeu̱we haabwa bu̱si̱ngu̱li̱ bwawe.
Tu̱ku̱u̱mu̱ki̱ya bhendela sya bu̱si̱ngu̱li̱ mu li̱i̱na lya Luhanga waatu.
Mukama akuukemu byona ebi okwete kumusaba.
6 Endindi nimani̱ye ngu
Mukama akuha bu̱si̱ngu̱li̱ mukama oghu aaseesi̱yʼo magita.
Akumukuukamu ku̱lu̱gha mu eghulu liye li̱hi̱ki̱li̱i̱ye
kandi haabwa maani̱ ghe, amuhe bu̱si̱ngu̱li̱.
7 Bamui mu bantu bakwesighagha baasilikale abakulwanagha bani̱i̱ni̱ye haa bigaali̱
kandi banji beesigha nkai̱na syabo,
bhaatu etu̱we tukwesighagha li̱i̱na lya Mukama Luhanga waatu.
8 Bantu aba balyegenga kandi bahuwʼo,
bhaatu etu̱we tuliimuka kandi twemilile tu̱gu̱mi̱ye.
9 Ai̱ Mukama, ohe mukama waatu bu̱si̱ngu̱li̱.
Otukuukemu nitwakubilikiiye.