19
Ki̱ti̱i̱ni̱sa kya Luhanga mu bihanguwa
Ewaa mukulu wa bilimbo. Jabbu̱li̱ ya Dhau̱dhi̱.
1 Eghulu li̱ku̱bu̱ghagha haa ki̱ti̱i̱ni̱sa kya Luhanga
kandi mwanya ghukulangilagha ebi akukolagha.
2 Bu̱li̱ ntangaali̱ ekulangililagha ntangaali̱ enji,
bu̱li̱ mukilo ekughambilagha mukilo enji magheji ghaa Luhanga.
3 Tabi̱ku̱koleesi̱yagha ebu̱gha, kedha bighambo,
elaka lyabiyo tabaku̱li̱i̱ghu̱wagha.
4 Bhaatu butumuwa bwabiyo bumalakaki̱ye kyalo kyona
kandi baku̱bwetegheeleli̱yagha munsi yoona.
Luhanga akata ka ya musana mu mwanya.
5 Ghukutuwaagha nkyambisi nga mugholi adheedheeu̱we,
nga mu̱li̱gi̱ti̱ oghu eeteekani̱i̱je ku̱li̱gi̱ta.
6 Ghukutwelagha luhande lumui lwa mwanya,
ghukotela haa luhande lunji.
Taaliyo ekikugubha kwebi̱si̱i̱li̱la kutuuma kwaghuwo.
Kilaghilo kya Mukama
7 Kilaghilo kya Mukama ki̱hi̱ki̱li̱i̱ye,
ki̱ku̱ku̱u̱ki̱yagha bwomi̱i̱li̱ mu mwoyo.
Ebi Mukama aku̱bu̱ghagha ni majima,
bikuhaagha magheji abatali nagho.
8 Njegheesi̱ya sya Mukama si̱hi̱ki̱ye,
sikulekagha muntu adheedhuwa haa mutima ghuwe.
Bilaghilo bya Mukama bi̱boneki̱ye bbeni̱-bbeni̱
kandi bikuhaagha kwetegheeleli̱ya.
9 Ku̱hu̱ti̱ya Mukama kusemeeye,
kubhonganuuwe kuukalʼo bilo nʼebilo.
Mukama aku̱twi̱lagha bantu musango mu bwengani̱ja
kandi mu majima bwile bwona.
10 Bibhonganuuwe kubyekumbula kwonini kusaali̱ya feeja,
kusaali̱ya feeja ekani̱ye eghi esemeleeye kimui.
11 Bikuhaagha magheji si̱ye mu̱heeleli̱ya waawe,
nkutungagha mpeela yamaani̱ haabwa ku̱bi̱hu̱ti̱ya.
12 Taaliyo oghu akugubha kwebona nsobi̱ siye eenini.
Mukama, oncungule ku̱lu̱gha mu bibhi ebi nkukolagha ntamani̱ye.
13 Otasi̱i̱mi̱lani̱ya si̱ye mu̱heeleli̱ya waawe,
kuukala niinakola bibhi ebi nimani̱ye,
onkingilile bibhi ebi kundema.
Nkuukala ntali nʼeki bakunsoghosʼo
kandi ntali na musango ghwa bikoluwa byamaani̱ bi̱bhi̱i̱hi̱ye.
14 Oleke bighambo byanje kandi ebi nkweli̱li̱kanagha haa mutima
bikudheedhe,
Ai̱ Mukama, kikuka kyanje kandi mu̱cu̱ngu̱li̱ wanje.