18
Kilimbo kya Dhau̱dhi̱ kya bu̱si̱ngu̱li̱
Ewaa mukulu wa bilimbo. Kilimbo kya Dhau̱dhi̱ mu̱heeleli̱ya wa Mukama. Akalimbila Mukama bighambo bini obu Mukama aamucunguuye ku̱lu̱gha mu ngi̱ghu̱ siye syona, bhaatu kukilamunu Saulo. Aaghila ati:
1 Nku̱ku̱ndi̱ye, Ai̱ Mukama,
nuuwe okumpaagha maani̱.
2 Mukama niiye kikuka kyanje, kigho kyanje kandi mu̱cu̱ngu̱li̱ wanje.
Luhanga wanje niiye kikuka kyanje, niiye nkuulukilaghʼo.
Niiye ngabo yanje kandi ehembe lya kujunuwa kwanje kandi niiye akundindagha.
3 Nkubilikilagha Mukama, oghu abhonganuuwe kumusinda
kandi akunjunagha ngi̱ghu̱ syanje!
4 Kabhi kaa lu̱ku̱ kakaba kaneeli̱ghi̱li̱i̱ye,
mighina ya kuhwelekeelela yampunga-hu̱ngi̱yagha.
5 Kabhi kaa lu̱ku̱ kakaba kaneeli̱ghi̱li̱i̱ye
kandi ki̱ki̱ya kya lu̱ku̱ kikaba kineeboheleeye.
6 Mu kubona-bona kwanje nkabilikila Mukama,
nkatakangana ewaa Luhanga wanje kunkoonela.
Aaghu̱wa elaka lyanje ali mu numba yee
kandi aaghu̱wa kutakangana kwanje kwa kubbala bu̱kooneli̱.
7 Nsi yaadhinga-dhinga kandi yaatukumila.
Mu̱si̱ki̱ ghwateela kandi ghwadhinga-dhi̱ngi̱ya misingi ya myena nanga Luhanga akaba asaaluuwe.
8 Mwi̱ka ghwalu̱gha mu mihuli yee,
mulilo hamui na makala ghaaki̱ye byaku̱hwelekeeleeli̱ya, byalu̱gha mu kanu̱wa ke.
9 Aatemula mwanya kandi aasu̱ndu̱ka
na kicu kinjilaghu̱li̱ kili hansi ya bighele biye.
10 Aani̱i̱na haa kelu̱bbi̱ kandi aahalala,
aaghendela haa mapapa ghaa mwegha.
11 Eeswi̱ki̱la na mweli̱ma kandi bicu bikwataane,
biisuuyemu maasi, byamweli̱ghi̱i̱li̱li̱ya.
12 Kyeleeli̱ ekyabaagha mu maaso ghe, kyalu̱ghamu bicu bikwataane,
mbu̱la ya lubaale na makala aghakwakʼo mulilo.
13 Mukama eetanuka nga nkubha ku̱lu̱gha mu eghulu,
elaka lya oghu ali Eghulu Munu lyalu̱ghamu mbu̱la ya lubaale, na makala ghakwakʼo mulilo.
14 Aabhasula bimala biye kandi aahanjaaga ngi̱ghu̱ siye,
aabbyoka nga nkubha kandi abalalangi̱ya.
15 Ai̱ Mukama, obu waalaghiiye
kandi nuwaatanuka ngi̱ghu̱ syawe na ki̱i̱ni̱gha kyawe,
hansi ya nanja aabooneka
kandi na misingi ya nsi yaaboneka.
16 Mukama aasu̱ndu̱ki̱ya mukono ghuwe ku̱lu̱gha mu eghulu kandi ankwata.
Anjiya mu maasi ghatobheeye.
17 Anjuna ngi̱ghu̱ syanje syamaani̱
kandi na boona abanjoi̱ye, abaali bambeleeye baamaani̱ munu.
18 Obu naabaagha mu kubona-bona, baasa kundwani̱i̱si̱ya,
bhaatu Mukama andinda.
19 Ankoonela ku̱lu̱gha mu kabhi,
anjuna haabwa kunkunda.
20 Mukama akumpaagha mpeela haabwa kukola ebi̱hi̱ki̱ye,
akumpaagha mi̱gi̱sa haabwa kubona ntali na musango.
21 Si̱ye nkukolagha ebi Mukama abbali̱ye
kandi tankalu̱ghaghʼo Luhanga wanje kukola bintu bi̱bhi̱i̱ye.
22 Nkwete bilaghilo biye byona kandi tankaghayagha ebi aku̱bu̱ghagha.
23 Amani̱ye ngoku ntali na musango
kandi nkeelinda kutasi̱i̱sa.
24 Mukama akumpaagha mpeela haabwa kukola ebi̱hi̱ki̱ye,
niikuwo abone ngoku ntali na musango.
25 Ai̱ Mukama, oli mwesighibuwa haa beesighibuwa
kandi oli mulungi haa abatali na kamogo.
26 Bantu balungi okubeeyolekagha ngoku oli mulungi,
bhaatu okusaakalilagha bantu babhi.
27 Okujunagha bantu abadhooti̱ye
kandi odhooti̱ya abali na myepanko.
28 Mukama nuuwe okumpaagha kyeleeli̱
kandi oleka mweli̱ma ghunfookela kyeleeli̱.
29 Okumpaagha maani̱ ku̱lu̱mba ngi̱ghu̱ syanje
kandi maani̱ ghaa kuhenda lugho lwabo.
30 Luhanga oghu kihanda kiye ki̱hi̱ki̱ye!
Bighambo biye byona ni majima!
Niiye ngabo ya boona abakumubbalagha kubalinda.
31 Mukama enkaha niiye Luhanga
kandi Luhanga oghu enkaha niiye kikuka kyatu.
32 Niiye Luhanga oghu akumpaagha maani̱
kandi angu̱bhi̱i̱si̱ya kukola ebi̱hi̱ki̱ye.
33 Niiye akumpaagha maghulu nga ghaa mpala,
aleka ni̱ni̱i̱na haa mwena ghukangami̱ye.
34 Niiye aku̱njegheesi̱yagha ku̱koleesi̱ya ngalo syanje kulwana,
niikuwo ngubhe kubhasula na mikono yanje buta bwa kyoma.
35 Nuuwe okumpaagha ngabo eghi ekumpaagha bu̱si̱ngu̱li̱,
mukono ghwawe ghwabuliyo ghukunsaghikagha
kandi bu̱kooneli̱ bwawe bumpaaye maani̱.
36 Nuuwe okumpaagha kihanda kigbaatikaane kya kukwamamu,
niikuwo bighele byanje bitatelebuka.
37 Nkuhumagha ngi̱ghu̱ syanje kandi mbakwata,
tankulekagha ku̱hi̱ki̱ya mbahwelekeleei̱ye boona.
38 Nkubagengagha hansi kandi batagubha kuumuka,
bakwegengagha hansi ya bighele byanje haabwa kubasi̱ngu̱la.
39 Okumpaagha maani̱ ghaa kulwana
kandi okulekagha ngi̱ghu̱ syanje baateeli̱ya hansi ya bighele byanje.
40 Okulekagha ngi̱ghu̱ syanje banjiluka
kandi mpwelekeeli̱ya boona abanjoi̱ye.
41 Bakutakanganagha mbasaba bu̱kooneli̱, bhaatu taaliyo nʼomui oghu akubajunagha.
Bakubilikilagha Mukama, bhaatu taakubakuukaghamu.
42 Nkabahuula boona bafooka nga tu̱u̱tu̱ eghi mpwegha eku̱hu̱ngi̱yagha.
Nkubakpeetagha nga bisaabo ebili mu kihanda.
43 Okunjunagha bantu bajeemi̱ kandi onfoola mu̱lemi̱ wa mahanga,
bantu aba ntamani̱ye endindi bakwete ku̱mpeeleli̱ya.
44 Banamahanga baku̱nteeleli̱yagha malu̱,
bakaaku̱nji̱ghu̱wagha, bakola ebi naabu̱ghi̱ye.
45 Bakuhuwaagha maani̱,
balu̱gha mu bigho byabo mbatukumila.
46 Mukama ni mwomi̱i̱li̱! Nku̱si̱i̱ma oghu ali kikuka kyanje!
Nkulangilila bukulu bwa Luhanga Mu̱ju̱ni̱ wanje.
47 Nuuwe Luhanga oghu okuhaagha mpeela abanjohi̱ye.
Okutaagha mahanga hansi ya bu̱toki̱ bwanje.
48 Nuuwe okunjunagha ngi̱ghu̱ syanje,
oleka nsi̱ngu̱la baji̱ndi̱ aba
kandi onkingilila bantu babhi.
49 Nahabweki nkukusindila mu mahanga ghoona,
nkulimba bilimbo bya kusinda li̱i̱na lyawe.
50 Luhanga, akuhaagha bu̱si̱ngu̱li̱ bwamaani̱ mukama oghu aakomi̱yemu.
Akwolekagha kukunda kwamaani̱ ewaa Dhau̱dhi̱ oghu aaseesi̱yʼo magita,
hamui na baasukulu be bilo nʼebilo.