17
Nsaala ya muntu oghu atali na musango
Nsaala ya Dhau̱dhi̱.
1 Ai̱ Mukama, ooghu̱we bighambo byanje bya bwengani̱ja.
Otegheeleli̱ye kutakangana kwanje haabwa bu̱kooneli̱!
Ooghu̱we nsaala yanje,
si̱ye oghu ntakuhaagha bisubha.
2 Nuuwe omani̱ye ngoku ntali na musango,
nanga nuuwe omani̱ye ebi̱hi̱ki̱ye.
3 Omani̱ye mutima ghwanje.
Waasi̱ye ewanje mukilo,
wandoli̱ye kwonini
kandi otansangamu kweghomba ku̱bhi̱i̱hi̱ye.
4 Tanku̱bu̱ghagha bighambo bi̱bhi̱i̱hi̱ye nga bantu banji,
nku̱hu̱ti̱yagha bilaghilo byawe
kandi tankukolanganagha na bantu babhi kandi abasaakaaye.
5 Nkulubhatangilagha mu kihanda kyawe bwile bwona,
bighele byanje tabikatelebukagha.
6 Ai̱ Luhanga, nuuwe nkusabagha nanga okunkuukaghamu,
nahabweki ondole kandi ooghu̱we kusaba kwanje.
7 Onjoleke kukunda kwawe kwamaani̱.
Haabwa bu̱toki̱ bwawe,
boona abakukwebingagha okubajunagha ngi̱ghu̱ syabo.
8 Ondoleelele nga mboni̱ ya li̱i̱so lyawe
kandi ombi̱se mu ki̱i̱ku̱du̱ kya mapapa ghaawe.
9 Ondinde mu bantu babhi abakwete kundwani̱i̱si̱ya
kandi ngi̱ghu̱ syanje abeeli̱ghi̱li̱i̱ye si̱ye abakubbala kunjita.
10 Ebo tabali na kisa
kandi ebi baku̱bu̱ghagha na kanu̱wa kaabo bikwolekagha ngoku bali na myepanko.
11 Endindi baneeli̱ghi̱li̱i̱ye hoona hambali nkaakwegaali̱li̱yagha,
niibuwo baabbala kahanda kaa kwita si̱ye.
12 Bali nga ntale syebi̱si̱ye, bandindiliiye,
niibuwo baabbala kunsabangulamu bi̱twi̱ka-twi̱ke.
13 Ai̱ Mukama, wiise kandi ohakani̱ye ngi̱ghu̱ syanje kandi obasi̱ngu̱le!
Onjune bantu babhi nookoleesi̱ya kihiyo kyawe.
14 Ai̱ Mukama, okoleesi̱ye mukono ghwawe ghwamaani̱
kunjuna bantu abakubbalagha mpeela yabo munsi eni.
Obahe kifubilo kya kubona-bona eki obabiikiiye,
ohe baana baabo ekikubamala,
oti̱ghʼo na ekikumala baasukulu baabo.
15 Bhaatu si̱ye ndikubona, nanga tandi na musango mu maaso ghaawe!
Obu ndi̱su̱su̱mu̱ka, kukubona kulileka ndheedhuwe.