16
Kusaba kandi kwesigha Luhanga
Jabbu̱li̱ ya Dhau̱dhi̱.
1 Ai̱ Luhanga, ondinde,
nanga nuuwe buulukilo bwanje.
2 Nkughilagha Mukama nti, “Nuuwe Mukama wanje,
bintu bilungi byona ebi ndinabiyo bi̱lu̱ghi̱ye ewaawe.”
3 Nkudheedhuwagha munu haabwa bantu baawe bahi̱ki̱li̱i̱ye,
aba niibo nkubbalagha kuukala nabo munsi muni.
4 Abakughendagha kulami̱ya baaluhanga banji,
bakweleetelejagha bijibu bikani̱ye.
Tanku̱hi̱ka hambali bakuhongela bihonguwa byabo
kandi ku̱ku̱mi̱ya na mi̱nu̱wa yanje mali̱i̱na ghaa baaluhanga baabo.
5 Uwe Mukama, nuuwe wenkaha ndi naawe.
Ebyanje byona nuuwe okubilindagha.
6 Bintu byona bikungendekelagha kusemeeye
kandi bugwetuwa bwanje busemeeye.
7 Nku̱si̱i̱ma Mukama, oghu akumpanuulilagha,
nankabha mukilo mutima ghwanje ghukungambilagha kya kukola.
8 Nimani̱ye Mukama akuukalagha nanje bwile bwona,
akunjikalagha haa mukono ghwanje ghwabuliyo, tankutukumila bbaa.
9 Nahabweki mutima ghwanje ghu̱dheedheeu̱we,
nkuukala nsemeleeuwe.
Mubili ghwanje ghuliikala ghuteekaane,
10 nanga toolileka mwoyo ghwanje Eku̱li̱mu̱,
kedha kuleka oghu ahi̱ki̱li̱i̱ye waawe naagu̱nda.
11 Okunjoleka kihanda kya bwomi̱i̱li̱,
uwe kuba hamui nanje kukulekagha ndheedhuwa
kandi ndheedhuwe kuukala haa mukono ghwawe ghwabuliyo bilo nʼebilo.