22
Kubona-bona kandi kusinda
Ewaa mukulu wa bilimbo. Kulimbila mu elaka lya “Nsama ya Nkyambisi.” Jabbu̱li̱ ya Dhau̱dhi̱.
1 Luhanga wanje, Luhanga wanje, wandu̱ghi̱yʼo bwaki?
Wanseli̱yʼo nangaaki kunjuna?
Niibuwo naalila nintaagha na bighambo bya kunkoonela.
2 Luhanga wanje, nkukubilikilagha bu̱li̱ ki̱lo ntangaali̱ na mukilo,
bhaatu tookunkuukaghamu, nahabweki tankughwesaghilagha.
3 Bhaatu dhee oli ahi̱ki̱li̱i̱ye kandi ositami̱ye haa ntebe yaawe ya bukama,
nuuwe bantu baa I̱saaleeli̱ babhonganuuwe kusinda.
4 Nuuwe baataata baatu beesi̱ghi̱ye,
bakakwesigha kandi waabajuna.
5 Bakakuliliilila kandi waabajuna,
baakwesigha kandi tawaabahemuuye.
6 Bhaatu si̱ye ndi nga mugodho kwonkaha, tandi muntu bbaa.
Bantu hoona-hoona banjoi̱ye kandi bakumbhengagha.
7 Boona abakakumbonagha bakunsekeelelagha,
baakala kuunambula mbanadhi̱ngi̱ya mituwe yabo.
8 Bakughilagha bati, “Eesi̱ghi̱ye Mukama,
dheluuni Mukama oghu amujune,
amukoonele alakaba amu̱ku̱ndi̱ye,
oleke amucungule.”
9 Nuuwe okanjiya kusemeeye munda ya maaha
kandi waaleka naakwesigha nankabha obu naanonkagha mabeele ghe.
10 Nkakwesigha ku̱lu̱gha haa kilo eki naabyaluuwemu
kandi nuuwe onali Luhanga wanje.
11 Otaakala onseli̱yʼo, nanga kabhi kali haai-haai
kandi tandi nʼoghu akunkoonela.
12 Ngi̱ghu̱ sikani̱ye si̱neeli̱ghi̱li̱i̱ye nga ntu̱u̱li̱ sya nte,
boona baneeli̱ghi̱li̱i̱ye nga nte sisaakaaye sya mu kyalo kya baa Bbasaani.
13 Ngi̱ghu̱ syanje bali nga ntale sikugboma
kandi niibuwo bandu̱mba baasami̱i̱ye mi̱nu̱wa.
14 Maani̱ ghampooye nga maasi baseesi̱ye hansi.
Maku̱wa ghanje ghoona ghasobaane,
mulilo oghukwete kunjaka mu ki̱ku̱bha,
ghwaleki̱ye mutima ghwanje ghwahiya.
15 Mumelo ghu̱njomi̱ye nga tu̱u̱tu̱
kandi kilimi kikuukalagha kinjimiliiye mu kanu̱wa.
Wandeki̱ye mu tu̱u̱tu̱ nga mu̱ku̱.
16 Kiigambi̱ kya bantu babhi baneeli̱ghi̱li̱i̱ye,
bali nga mbuwa sikaniiye kimui.
Bantu̱bhi̱ti̱ye mikono kandi mu maghulu.
17 Maku̱wa ghanje ghoona nkugubha kughabala,
ngi̱ghu̱ syanje bakuukalagha bandoli̱ye kubhi kwonini.
18 Baatambulaane biigandulo byanje,
baakoma buluulu kumanya oghu akutwala ngoye syanje.
19 Ai̱ Mukama, otaakala onseli̱yʼo!
Wiise bwangu kunkoonela!
20 Onjune kihiyo kandi
onjune ku̱lu̱gha mu maani̱ ghaa mbuwa esi.
21 Onjune ku̱lu̱gha mu kanu̱wa kaa ntale esi,
tandi na bu̱kooneli̱ ku̱lu̱gha mu mahembe ghaa mbogho esi.
22 Nkulangilila li̱i̱na lyawe mu baana baa maaha,
nkukusinda mu kusanga-sangaana kwabo.
23 Enu̱we abahu̱ti̱i̱ye Mukama, mumusinde!
Enu̱we baasukulu baa Yakobbo, mumuhe ki̱ti̱i̱ni̱sa!
Enu̱we bantu baa I̱saaleeli̱, mumulami̱ye!
24 Taabuluuwe munaku kedha kughaya kubona-bona kuwe
kandi taakumulu̱ghaghʼo,
taakamwebi̱si̱li̱i̱ye bbaa.
Bhaatu aku̱tegheeleli̱yagha kutakangana kuwe haabwa bu̱kooneli̱.
25 Mu kusanga-sangaana kwa bantu boona,
nkukusinda haabwa ebi okukolagha.
Mu maaso ghaa bantu boona abakukulami̱yagha,
niiyʼo nkuhongela bihonguwa ebi neelaghi̱i̱sani̱i̱ye.
26 Banaku bakuliya baakute ngoku bakabbali̱ye,
boona abakubbalagha Mukama bakumusinda.
Bakuba na kudheedhuwa kwa bilo nʼebilo mu mitima yabo!
27 Mahanga ghoona ghakuusuka Mukama.
Bakumukuukʼo ku̱lu̱gha mu bu̱li̱ ki̱twi̱ke kya nsi
kandi bantu baa bu̱li̱ ntu̱la bakumulami̱ya.
28 Mukama niiye mu̱lemi̱
kandi alemi̱ye mahanga ghoona.
29 Oleke baguudha baa munsi muni bakole maghenu̱ kandi balami̱ye.
Bantu boona abali haai ku̱ku̱wa baku̱teeli̱ya mu maaso ghe,
aba abataakugubha kwehikali̱yʼo bali boomi̱i̱li̱.
30 Mijo eghi ekwisa mu maaso eli̱mu̱heeleli̱ya
kandi nabo balighambila baasukulu baabo haa bikwetʼo Mukama.
31 Bantu abatakabyahuwe balibaghambila ngu,
“Mukama akajuna bantu be.”