23
Mukama niiye mu̱li̱i̱si̱ya wanje
Jabbu̱li̱ ya Dhau̱dhi̱.
1 Mukama niiye mu̱li̱i̱si̱ya wanje,
tandi nʼeki nkwetaaghisibuwa.
2 Akulekagha ndangaala haa bu̱si̱ngo buheheeye.
Akuntwalagha haakpengbu̱ ya maasi ghateekaane.
3 Aku̱ku̱u̱ki̱yaghamu maani̱ mwoyo ghwanje.
Akunkwami̱li̱yagha mu kihanda ki̱hi̱ki̱ye,
ngoku aalaghi̱i̱sani̱i̱ye.
4 Nankabha nkwamila mu kighona kya mweli̱ma kya lu̱ku̱,
tankwobaha kabhi na kamui bbaa,
nanga uwe Mukama oli hamui nanje.
Mwi̱gho ghwawe na kibbooko kyawe, bi̱ku̱mpu̱u̱mu̱li̱yagha.
5 Okunteekani̱li̱yagha kiihulo,
mu maaso ghaa ngi̱ghu̱ syanje.
Onseesa magita haa mutuwe,
kiikopo nkunwelamu oku̱ki̱i̱su̱li̱yagha ki̱seesekeli̱ya.
6 Majima kuwo bulungi bwawe na kukunda kwawe kwamaani̱,
bikunjikalamu bilo byona bya bwomi̱i̱li̱ bwanje
kandi ndaakalagha mu Numba ya Mukama bilo nʼebilo.