24
Mukama wa ki̱ti̱i̱ni̱sa
Jabbu̱li̱ ya Dhau̱dhi̱.
1 Nsi nʼebilimu byona ni bya Mukama.
Nsi ni yee na abaghikaayemu boona.
2 Niiye akata misingi yayo haa maananja
kandi aaghikwela haa maasi.
3 Ni ani̱ akugubha ku̱ni̱i̱na haa mwena ghwa Mukama?
Ni ani̱ akusobola kwemilila mu ki̱i̱kalo ki̱hi̱ki̱li̱i̱ye kiye?
4 Ni oghu ali na mikono esemeeye kandi mutima ghulungi.
Oghu ataakulami̱yagha bisasani̱ kandi kuha bisubha.
5 Mukama, akumuha mu̱gi̱sa
kandi Luhanga Mu̱ju̱ni̱ wee akumuuyʼo musango.
6 Bantu abali nga muntu oghu niibo bakukubbalagha
kandi balami̱ya mu maaso ghaawe, uwe Luhanga wa Yakobbo.
7 Mwehighule enu̱we maageeti̱
na njighi sya hambele!
Mukama wa ki̱ti̱i̱ni̱sa ataahemu.
8 Mukama wa ki̱ti̱i̱ni̱sa oni, ni ani̱?
Ni Mukama wamaani̱ kandi wa bu̱toki̱.
Mukama oghu aku̱si̱ngu̱lagha haa bulemo.
9 Mwehighule enu̱we maageeti̱
na njighi sya hambele!
Mukama wa ki̱ti̱i̱ni̱sa ataahemu.
10 Mukama wa ki̱ti̱i̱ni̱sa oni, ni ani̱?
Mukama waamahe niiye Mukama wa ki̱ti̱i̱ni̱sa!