25
Nsaala ya kwebembeluwa kandi kulinduwa
Jabbu̱li̱ ya Dhau̱dhi̱.
1 Ai̱ Mukama,
nuuwe nkwete kusaba.
2 Ai̱ Luhanga wanje, nuuwe neesi̱ghi̱ye,
otaleka nimpemuka kandi ngi̱ghu̱ syanje mbansi̱ngu̱la.
3 Taaliyo oghu ataaye kunihila kuwe ewaawe
oghu alihemuka,
bhaatu kuhemuka ku̱ku̱hi̱kʼo
abakwangu̱hi̱yagha kukujeemela.
4 Ai̱ Mukama, onjoleke bihanda byawe
kandi onjegheesi̱ye luguudhe lwa kukwama.
5 Ompikile mu majima ghaawe kandi onjegheesi̱ye,
nanga nuuwe Luhanga wanje oghu akunjunagha.
Nuuwe nkwesighagha bwile bwona.
6 Ai̱ Mukama, oosuke kisa kyawe kandi kukunda kwawe kwamaani̱,
ebi wooleki̱ye ku̱lu̱gha hambele.
7 Otaasuka bibhi kandi bikoluwa byanje bi̱bhi̱i̱hi̱ye ebi naakoli̱ye ninali muujongo.
Ai̱ Mukama,
onjisuke haabwa kukunda kwawe kwamaani̱ kandi kisa kyawe.
8 Mukama ahi̱ki̱li̱i̱ye kandi ni mulungi,
akwegheesi̱yagha basi̱i̱si̱ kihanda eki babhonganuuwe kukwama.
9 Akuhikilagha abadhooti̱ye kukola ebi̱hi̱ki̱ye
kandi abeegheesi̱ya ebi akubbalagha ati bakole.
10 Akuhikilagha na bwesighibuwa kandi kukunda kwamaani̱,
boona abakukwatagha ndaghaano yee kandi bahu̱ti̱ya bilaghilo biye.
11 Ai̱ Mukama, haabwa li̱i̱na lyawe,
onganile ebi naasobeei̱ye, nanga bikaniiye kimui.
12 Buuye mbaki abahu̱ti̱i̱ye Mukama?
Akubooleka kihanda eki babhonganuuwe kukwamamu.
13 Bakukula-kulana bwile bwona
kandi baana baabo bakugwetuwa nsi.
14 Mukama ni bhootu̱ sya bantu abamu̱hu̱ti̱i̱ye
kandi akulekagha bamanya ndaghaano yee.
15 Maaso ghanje ghakuukalagha ghaloli̱ye Mukama bwile bwona
kandi akunjunagha ku̱lu̱gha mu bi̱ki̱ya bya ngi̱ghu̱ syanje.
16 Ai̱ Mukama, weegaali̱ye hambali ndi kandi ongilile kisa,
nanga ndi nenkaha kandi ndi muceke.
17 Bijibu byanje bikuukalagha mbineeyongela,
onjune bi̱lemeeji̱ byanje ebi byona.
18 Olole bujune bwanje kandi kubona-bona kwanje,
onganile bibhi byanje byona.
19 Olole ngoku ndi na ngi̱ghu̱ sikani̱ye
kandi oboone ngoku banjoheeye kimui.
20 Onkingilile kandi onjune,
otasi̱i̱ma nimpemuka,
nanga nuuwe nkuulukilaghʼo kundinda.
21 Oleke bulungi na majima ghanje bindindaghe,
nanga nuuwe neesi̱ghi̱ye.
22 Ai̱ Luhanga, ocungule bantu baawe baa I̱saaleeli̱,
ku̱lu̱gha mu bijibu byabo byona.