26
Nsaala ya muntu mulungi
Jabbu̱li̱ ya Dhau̱dhi̱.
1 Ai̱ Mukama, oleke nsi̱nge musango,
nanga nkukolagha ebi̱hi̱ki̱ye
kandi nkwesi̱ghi̱ye kwonini Mukama, tankaku̱lu̱ghaghʼo.
2 Ai̱ Mukama, ondole kandi ondengese,
olole mutima ghwanje kandi byeli̱li̱kano byanje.
3 Nimani̱ye ngoku oli na kukunda kwamaani̱
kandi niikaayʼo haabwa bwesighibuwa bwawe.
4 Tankuukalagha na bantu abakuhaagha bisubha
kandi tankukolanganagha na bantu ngobi̱ya.
5 Noohi̱ye kuukala na bantu abakukolagha bintu bi̱bhi̱i̱hi̱ye
kandi nkubhengagha kuukala na bantu babhi.
6 Mukama, nkunaabagha mu ngalo kwoleka ngoku ntali na musango
kandi mu kulami̱ya nkughendagha neeli̱ghi̱i̱li̱li̱ya
eki bakuhongelaghʼo bihonguwa kyawe.
7 Nkulimbagha kilimbo kya ku̱si̱i̱ma
kandi ngambila bantu byakuswekani̱ya ebi okukolagha.
8 Mukama, nku̱ndi̱ye numba yaawe hambali okuukalagha,
ki̱i̱kalo hambali ki̱ti̱i̱ni̱sa kyawe kikubonekagha.
9 Otampwelekeeleli̱ya hamui na basi̱i̱si̱,
otantwi̱la musango hamui na baji̱ndi̱.
10 Bakuukalagha mbakola bintu bi̱bhi̱i̱hi̱ye
kandi mbaliya ngu̱ji̱ bwile bwona.
11 Bhaatu nkukolagha ebi̱hi̱ki̱ye,
ongilile kisa kandi onjune.
12 Endindi neemiliiye na bighele byanje haa etaka lyomiiye
kandi mu kusanga-sangaana kwa bantu be bakani̱ye nku̱si̱i̱ma Mukama.