27
Nsaala ya kusinda Mukama
Jabbu̱li̱ ya Dhau̱dhi̱.
1 Mukama niiye kyeleeli̱ kyanje kandi niiye akunjunagha,
tandi nʼoghu nkwobaha.
Mukama niiye akundindagha ku̱lu̱gha mu kabhi koona,
tandi nʼoghu aku̱ntu̱ku̱mi̱li̱ya.
2 Obu bantu babhi baku̱ndu̱mbagha kandi babbala kunjita,
bakukobhokagha kandi beegenga.
3 Nankabha baasilikale bakani̱ye baneeli̱ghi̱i̱li̱li̱ya,
tankwobaha,
nankabha ngi̱ghu̱ syanje bandu̱mba,
nkuukala ni̱neesi̱ghi̱ye Luhanga.
4 Nkusabagha Mukama kintu kimui kyonkaha
kandi niikiyo kintu kimui kyonkaha nkubbalagha.
Nkubbalagha kuukala mu numba ya Mukama
bilo byona bya bwomi̱i̱li̱ bwanje,
niikuwo mbone bulungi bwa Mukama
kandi ampanuulile mu numba yee.
5 Mu bwile bwa bijibu akundinda kusemeeye mu ki̱i̱kalo kiye.
Aku̱mbi̱sa mu ki̱i̱ku̱dhu̱ kya weema ehi̱ki̱li̱i̱ye yee
kandi ante hambali akangami̱ye haa kikuka.
6 Du̱mbi̱ nku̱si̱ngu̱la ngi̱ghu̱ syanje esyeli̱ghi̱li̱i̱ye si̱ye.
Nkuhonga bihonguwa mu weema ehi̱ki̱li̱i̱ye ya Mukama
kandi ndimbe na kudheedhuwa bilimbo bya kumusinda.
7 Ai̱ Mukama, ninaakubilikiiye, onji̱ghu̱we!
Ongilile kisa kandi okuukemu kusaba kwanje!
8 Obu waaghi̱li̱ye oti, “Wiise ondami̱ye.” Nkakuukamu nti,
“Mukama, nkwisa kukulami̱ya.”
9 Gutu otaneebi̱si̱i̱li̱la.
Otalu̱ghʼo mu̱heeleli̱ya waawe na ki̱i̱ni̱gha,
nuuwe okubaagha mu̱kooneli̱ wanje.
Otambhinga kandi otalu̱gha hambali ndi.
Ai̱ Luhanga, Mu̱ju̱ni̱ wanje.
10 Nankabha tita na maaha bandu̱ghʼo,
Mukama akundinda.
11 Ai̱ Mukama,
onjegheesi̱ye ebi okubbala oti nkole
kandi ompikile mu kihanda eki̱hi̱ki̱ye, nanga ndi na ngi̱ghu̱ sikani̱ye.
12 Otandu̱ghʼo mu ngi̱ghu̱ syanje,
abakwete kundwani̱i̱si̱ya mbakoleesi̱ya bisubha
kandi bighambo bya kunjobahi̱i̱li̱li̱ya.
13 Nimani̱ye ngoku nkuukalʼo kubona bulungi bwa Mukama
munsi ya boomi̱i̱li̱!
14 Mwesighe Mukama, mube na ku̱hi̱ki̱li̱ja,
mutahuwa maani̱.
Mwesighe Mukama.