28
Nsaala ya bu̱kooneli̱
Jabbu̱li̱ ya Dhau̱dhi̱.
1 Ai̱ Mukama, nuuwe nkwete kubilikila,
uwe oghu oli kikuka kyanje.
Oteehighali̱i̱si̱ya matui ewanje,
nanga nuwaakaaye oholeei̱ye,
nkuba mu aba bakujiika mu kituulo.
2 Ooghu̱we elaka lya kwesengeleli̱ya kwanje,
obu nkuba ninkubilikila kunkoonela,
obu nkuba ni̱i̱mu̱ki̱i̱ye mikono yanje
ndoli̱ye numba yaawe ehi̱ki̱li̱i̱ye.
3 Otantwi̱la musango hamui na bantu babhi,
hamui na abakukolagha bintu bi̱bhi̱i̱hi̱ye.
Abaku̱bu̱ghagha kulungi na baanakyabo,
bhaatu mu mitima yabo baasuuyemu etima.
4 Obafubile kusighikila haa ebi bakwete kukola,
haabwa bintu bi̱bhi̱i̱hi̱ye bakwete kukola.
Obafubile haabwa bikoluwa byabo byona,
obahe kifubilo ekibasemeleeye.
5 Haabwa kutahu̱ti̱ya ebi Mukama aakukolagha,
kedha ebi aakoli̱ye na mikono yee,
nahabweki alibagenga
kandi taalitodha kubakwela buhyaka.
6 Mukama asi̱i̱mu̱we!
Aaghu̱u̱ye kwesengeleli̱ya kwanje.
7 Mukama niiye maani̱ ghanje kandi ngabo yanje.
Niiye nkwesighagha na mutima ghwanje ghwona.
Niiye akunkoonelagha kandi aleka ndheedhuwa.
Nku̱mu̱si̱i̱ma na bilimbo bya kusinda.
8 Mukama akuhaagha bantu be maani̱.
Niiye akulindagha kandi ajuna mu̱lemi̱ oghu aaseesi̱yʼo magita.
9 Mukama, ojune bantu baawe kandi ohe mu̱gi̱sa bagwetuwa baawe,
obe mu̱li̱i̱si̱ya wabo kandi obaheeke mu mikono yaawe bilo nʼebilo.