29
Elaka lya Mukama mu kyegha
Jabbu̱li̱ ya Dhau̱dhi̱.
1 Musinde Mukama, enu̱we ebili mu eghulu,
musinde ki̱ti̱i̱ni̱sa kiye kandi maani̱ ghe.
2 Musinde li̱i̱na lya Mukama lya ki̱ti̱i̱ni̱sa,
mulami̱ye Mukama nanga ahi̱ki̱li̱i̱ye.
3 Elaka lya Mukama baku̱li̱i̱ghwi̱lagha haa nanja,
Luhanga wa ki̱ti̱i̱ni̱sa akwetanukagha nga nkubha,
ti̱ elaka liye bali̱i̱ghwi̱la haa nanja.
4 Elaka lya Mukama ni lyamaani̱,
elaka lya Mukama ni lya bu̱toki̱.
5 Elaka lya Mukama likugengagha bi̱i̱looku̱.
Likwatakaki̱yagha bi̱i̱looku̱ bya myena ya Lebbanooni̱.
6 Akulaghila mwena ghwa Lebbanooni̱ kuhalala nga kyana kya mbu̱li̱
kandi mwena ghwa Si̱li̱yooni̱*29:6 Bbai̱bbu̱li̱ sinji sighambi̱ye Mwena ghwa Hemoni̱. kuhalala nga kyana kya mbogho.
7 Elaka lya Mukama
likwakagha nga bilimi bya mulilo.
8 Elaka lya Mukama likudhinga-dhi̱ngi̱yagha elungu,
Mukama akudhinga-dhi̱ngi̱yagha elungu lya Kadesi̱.
9 Elaka lya Mukama likudhinga-dhi̱ngi̱yagha mbala
kandi lilaghali̱ki̱ya bibabi haa biti mu bi̱bhi̱li̱.
Ti̱ bu̱li̱ omui mu numba ya Luhanga aku̱bu̱ghagha nʼelaka lyamaani̱ ati, “Luhanga aheebuwe ki̱ti̱i̱ni̱sa!”
10 Mukama alemi̱ye haa maasi ghatungeeye,
Mukama alemi̱ye asitami̱ye haa ntebe ya bukama bilo nʼebilo.
11 Mukama niiye akuhaagha bantu be maani̱
kandi Mukama oghu niiye akubahaagha mi̱gi̱sa kutunga mpempa.