30
Nsaala ya ku̱si̱i̱ma
Jabbu̱li̱ ya Dhau̱dhi̱. Kilimbo eki aali̱mbi̱ye haa kuhaayo Numba ya Luhanga.
1 Ai̱ Mukama, nkukusinda nanga okanjuna
kandi tawaasi̱i̱mi̱lani̱i̱ye ngi̱ghu̱ syanje kunempankilʼo.
2 Ai̱ Mukama Luhanga wanje, nkatakangana kunkoonela
kandi wanki̱li̱ya.
3 Ai̱ Mukama, nuuwe okanjiya mu baku̱u̱ye,
naaghendagha kwegenga mu ki̱i̱na, bhaatu wanjiyamu.
4 Mulimbe bilimbo bya kusinda Mukama, enu̱we boona bantu be bahi̱ki̱li̱i̱ye!
Mu̱si̱i̱me li̱i̱na liye li̱hi̱ki̱li̱i̱ye.
5 Ki̱i̱ni̱gha kiye kikumalagha bwile bukee,
bhaatu ngughuma siye sikuukalaghʼo bwile bwona.
Kulila kukubaaghʼo mukilo,
bhaatu kudheedhuwa kwisa nkyambisi.
6 Obu naabaagha nteekaane, naaghilagha nti,
“Taaliyo eki̱ku̱ntu̱ku̱mi̱li̱ya.”
7 Ai̱ Mukama, obu wangiliiye kisa,
okangu̱mi̱ya nga mwena ghwamaani̱.
Bhaatu obu waaneebi̱si̱li̱i̱ye,
maani̱ ghampuwa.
8 Ai̱ Mukama, nkakubilikila
kandi naakwesengeleli̱ya kungilila kisa ningila nti,
9 “Ni maghobo ki okutunga ninaaku̱u̱ye?
Okutunga ki ninaaghendi̱ye mu kituulo?
Tu̱u̱tu̱ yanje ekugubha kukusinda?
Ekugubha kughambila bantu bwesighibuwa bwawe?
10 Ai̱ Mukama, onji̱ghu̱we kandi ongilile kisa!
Ai̱ Mukama, onkoonele.”
11 Kweghunga kwanje okakufoolamu ku̱bi̱na kwa kudheedhuwa.
Okanjiyamu bi̱lu̱waalo bya bujune,
wandwi̱ka bya kudheedhuwa.
12 Nahabweki tanku̱holi̱ya, nkukulimbila bilimbo bya kukusinda.
Ai̱ Mukama Luhanga wanje, ndaku̱si̱i̱magha bilo nʼebilo.