31
Nsaala ya kwesigha Mukama
Ewaa mukulu wa bilimbo. Jabbu̱li̱ ya Dhau̱dhi̱.
1 Ai̱ Mukama, nuuwe buulukilo bwanje,
otaleka nimpemuka.
Onjune haabwa bu̱hi̱ki̱li̱i̱le bwawe.
2 Ontegheeleli̱ye na kutui kwawe
kandi onjune bwangu!
Obe kikuka kyanje kya kuulukilamu,
kigho kyanje kyamaani̱ kunjuna.
3 Nuuwe kikuka kyanje kandi kigho kyanje,
haabwa li̱i̱na lyawe ompikile kandi ontwale mu kihanda eki̱hi̱ki̱ye.
4 Onjiye mu ki̱ki̱ya eki ngi̱ghu̱ syanje bantegheeye,
nanga uwe wenkaha nuuwe buulukilo bwanje.
5 Mwoyo ghwanje naaghuta mu mukono ghwawe, Mukama okunjuna,
nanga oli Luhanga mwesighibuwa.
6 Noohi̱ye abakulami̱yagha bisasani̱ bitali na mughaso,
neesigha Mukama.
7 Nkudheedhuwa kandi neeghonje, haabwa kukunda kwawe kwamaani̱,
nanga oboone kubona-bona kwanje
kandi omani̱ye bijibu byanje.
8 Tawampayeyo mu mikono ya ngi̱ghu̱ syanje,
bhaatu wantaaye mu ki̱i̱kalo kigbaatikaane kya kasi̱nge.
9 Mukama ongilile kisa, nanga ndi mu bijibu.
Maaso ghandu̱hi̱ye haabwa kulila kukani̱ye.
Maani̱ ghampweleeye kimui.
10 Kutuntula kukunjita,
myaka yanje yaakeei̱ye haabwa kuukala nsaaluuwe.
Ebi naasobeei̱ye byaleki̱ye maani̱ ghampuwa
kandi na maku̱wa ghanceki̱ye.
11 Ngi̱ghu̱ syanje tibamboonemu nga muntu bhebe
kandi baanakyanje bakwete kungaya.
Baabhootu̱ syanje bakwobaagha kwisa hambali ndi.
Bakaakumbonagha mu nguudhe bali̱gi̱ta.
12 Bantu bakanjibululuwa ngʼoghu oti nkaku̱wa,
ndi nga munagha ghwati̱ki̱ye.
13 Ni̱i̱ghu̱u̱ye lughambo lukani̱ye ewanje,
kabhi kaneeli̱ghi̱li̱i̱ye.
Ngi̱ghu̱ syanje niibuwo baahanuula kunkola kubhi
kandi baategheka kunjita.
14 Bhaatu uwe Mukama,
nuuwe neesi̱ghi̱ye, nuuwe Luhanga wanje.
15 Bwomi̱i̱li̱ bwanje buli mu ngalo syawe.
Onjune ngi̱ghu̱ syanje,
onjune abakwete kumbona-boni̱ya.
16 Oghilile mu̱heeleli̱ya waawe kisa,
onjune haabwa kukunda kwawe kwamaani̱.
17 Mukama, otaleka nimpemuka,
nanga nuuwe nkwete kubilikila.
Oleke bantu babhi bahemuke
kandi baku̱we baghende mu ki̱i̱kalo ki̱holeei̱ye kya baku̱u̱ye.
18 Oholeesi̱ye abakuhaagha bisubha aba,
abali na myepanko
kandi abaku̱bu̱ghaghʼo kubhi bantu bahi̱ki̱li̱i̱ye.
19 Obiikiiye abaku̱ku̱hu̱ti̱yagha,
bintu bilungi bikani̱ye!
Okubihaagha abakukwisaghʼo kubalinda
kandi okulindagha kusemeeye boona abakukuulukilaghʼo.
20 Okubabisagha mu ki̱i̱ku̱dhu̱ kya kubʼo kwawe.
Obajuna bantu abakwete kuhanuula kubakola kubhi.
Obalinda kusemeeye hambali oli,
obaseli̱ya ku̱lu̱gha mu bantu abakwete kubabu̱ghʼo kubhi.
21 Mukama asi̱i̱mu̱we!
Akanjoleka kukunda kuwe kwamaani̱
obu abandu̱mbagha baabaagha beeli̱ghi̱li̱i̱ye kibugha kyatu kutulwani̱i̱si̱ya.
22 Niinatukumila naaghila nti,
“Mukama wambhi̱ngi̱ye mu maaso ghaawe.”
Bhaatu waaghu̱wa elaka lya kwesengeleli̱ya kwanje,
obu naakubilikiiye kunkoonela.
23 Mukunde Mukama, enu̱we boona bantu be beesighibuwa.
Mukama akulindagha bantu abamwesi̱ghi̱ye,
bhaatu abali na myepanko akubahaagha kifubilo ekibabhonganuuwe.
24 Nahabweki mube baamaani̱ kandi mugume,
enu̱we abataaye kunihila kwanu mu Mukama.