32
Kwatula bibhi kandi kughaniluwa
Jabbu̱li̱ ya Dhau̱dhi̱.
1 Ali na mu̱gi̱sa oghu Luhanga akughanilagha bikoluwa biye bi̱bhi̱i̱hi̱ye
kandi aamuuyʼo bibhi biye.
2 Ali na mu̱gi̱sa muntu oghu Mukama akubalagha ati taali nʼeki asobeei̱ye
kandi oghu ataakuhaagha bisubha.
3 Obu naabhengi̱ye kwatula bibhi byanje,
maani̱ ghampwela kimui haabwa kuukala nindila kilo kyona.
4 Mukilo na ntangaali̱ okanfubila kwonini.
Maani̱ ghampwela kimui ngoku kyanda ki̱kwomi̱yagha maasi.
5 Niibuwo naatuuye bibhi byanje ewaawe
kandi naaleka ku̱bi̱sa bikoluwa byanje bi̱bhi̱i̱hi̱ye.
Naaghila nti, “Nkwatula ebi naasobeei̱ye ewaa Mukama,”
wanganila musango ghwa bibhi byanje.
6 Nahabweki oleke bantu baawe bakusabaghe noonaboneka,
nankabha bijibu byengaane na maasi ghatungeeye biisa, bitabahi̱kʼo.
7 Nuuwe bwebi̱si̱lo bwanje,
okunjuna ku̱lu̱gha mu bijibu.
Nkukulimbila bilimbo bya kucunguluwa.
8 Mukama akughilagha ati,
“Nku̱kwegheesi̱ya mulingo obhonganuuwe kughendelamu,
nkukuhana kandi nkuloleelele.
9 Mutaba nga nkai̱na kedha ndogooi̱ esitali na magheji,
esi bakutaagha byoma mu kanu̱wa
kandi mighuwo mu ki̱ku̱bha niikuwo sibadhootele.”
10 Bantu babhi bakubona-bona kwonini,
bhaatu abakwesighagha Mukama, akubalindagha haabwa kukunda kuwe kwamaani̱.
11 Nahabweki enu̱we abahi̱ki̱li̱i̱ye, mudheedhuwe kandi musemeeleluwe mu Mukama.
Mulimbe nʼelaka lyamaani̱ lya kudheedhuwa enu̱we abali na mitima esemeeye!