33
Kilimbo kya kusinda Mukama
1 Mulimbile Mukama nʼelaka lya kudheedhuwa enu̱we abahi̱ki̱li̱i̱ye,
bantu balungi babhonganuuwe kumusinda.
2 Musinde Mukama ni̱mu̱koleesi̱ya maali̱kembe
kandi mumulimbile ni̱mu̱koleesi̱ya du̱ngu̱.
3 Mumulimbile nʼelaka lyamaani̱ kilimbo kihyaka,
muteele du̱ngu̱ kusemeeye kandi mulimbe nʼelaka lyamaani̱ mu̱dheedheeu̱we.
4 Kighambo kya Mukama ki̱hi̱ki̱ye kandi ni kyamajima,
ni mwesighibuwa mu byona ebi akukolagha.
5 Mukama abbali̱ye bu̱hi̱ki̱li̱i̱le kandi bwengani̱ja,
nsi yoona eesuuyemu kukunda kuwe kwamaani̱.
6 Mukama akabu̱gha kighambo kwonkaha ebili mu eghulu byahanguwa.
Aalaghila kwonkaha, ebili mu mwanya byona byabʼo.
7 Aateelʼo maananja mitaano,
aabiika maasi ghaa nanja ghatobheeye
ngoku muntu akubiikagha ndimo yee mu nguli.
8 Oleke nsi yoona yoobahe Mukama
kandi bantu boona baa munsi bamu̱hu̱ti̱ye.
9 Obu aabu̱ghi̱ye, nsi yaahanguwa
kandi obu aalaghiiye, bu̱li̱ kintu kyabʼo.
10 Mukama niiye akumalaghʼo magheji ghaa mahanga
kandi abulangani̱ya ntegheka sya bantu.
11 Bhaatu kuhana kwa Mukama kukuukalagha ku̱gu̱mi̱ye bilo nʼebilo.
Akubaagha na ntegheka haa mutima ghuwe sya mijo yoona.
12 Lili na mu̱gi̱sa ehanga eli Luhanga ali Mukama waliyo.
Bantu aba aakomi̱ye kuba bagwetuwa be.
13 Mukama anali mu eghulu
akulolagha hansi mu bantu boona.
14 Anasitami̱ye haa ntebe yee ya bukama,
akuukalagha aloli̱ye boona abali munsi.
15 Niiye akakola mitima yabo,
nahabweki amani̱ye ebi bakukolagha byona.
16 Mukama taaku̱si̱ngu̱lagha bulemo haabwa mahe ghe ghaamaani̱
kandi muusilikale taakucunguluwagha haabwa maani̱ ghe.
17 Nkai̱na bakulwanagha bani̱i̱ni̱yʼo teeli na mughaso haa bu̱si̱ngu̱li̱,
nankabha eba eli na maani̱, teekugubha kujuna muntu.
18 Mukama akuloleelelagha abamu̱hu̱ti̱i̱ye.
Abakutaagha kunihila kwabo mu kukunda kuwe kwamaani̱.
19 Akubajunagha lu̱ku̱,
abalinda baakala bali boomi̱i̱li̱ mu bwile bwa njala.
20 Tukutaagha kunihila kwatu mu Mukama.
Niiye mu̱kooneli̱ waatu kandi ngabo yaatu.
21 Niiye akulekagha mitima yaatu edheedhuwa,
nanga twesi̱ghi̱ye li̱i̱na liye li̱hi̱ki̱li̱i̱ye.
22 Mukama, oleke kukunda kwawe kwamaani̱ kutuukalemu,
nanga nuuwe wenkaha tutaayemu kunihila kwatu.