34
Bulungi bwa Luhanga
Jabbu̱li̱ ya Dhau̱dhi̱, obu eefooye nga mu̱ghwesi̱le mu maaso ghaa Abbi̱meleeki̱, du̱mbi̱ Abbi̱meleeki̱ aamubhinga ewe, aalu̱ghayo aaghenda.
1 Nku̱si̱i̱ma Mukama bwile bwona,
tankulekeelela kumusinda.
2 Nkumusinda haabwa ebi akukolagha.
Oleke boona abatali na mu̱kooneli̱ bategheeleli̱ye kandi badheedhuwe.
3 Mwise tulangilile hamui bukulu bwa Mukama.
Muleke tusindile hamui li̱i̱na liye.
4 Nkasaba Mukama, ankuukamu,
anjuna byona ebi naabaagha noobahi̱ye.
5 Abakumubbalagha kubakoonela bakudheedhuwa
kandi tabalihemuka.
6 Nkaba ntali na bu̱kooneli̱, naasaba,
Mukama anji̱ghu̱wa kandi anjuna bijibu byanje byona.
7 Abahu̱ti̱i̱ye Mukama, malai̱ka wee akubalindagha
kandi aabacungula ku̱lu̱gha mu kabhi.
8 Mu̱loli̱yʼo mulole ngoku Mukama ali mulungi.
Bali na mu̱gi̱sa abakumuulukilaghʼo kubalinda.
9 Mu̱hu̱ti̱ye Mukama, enu̱we bantu be bahi̱ki̱li̱i̱ye.
Abaku̱mu̱hu̱ti̱yagha akubahaagha byona ebi bakwetaaghisibuwa.
10 Nankabha ntale syamaani̱ bunji nʼobunji njala ekusikwatagha.
Bhaatu abeesi̱ghi̱ye Mukama tabali na kintu kilungi eki bakwetaaghisibuwa.
11 Mwise, baana banje, mu̱ntegheeleli̱ye,
nku̱beegheesi̱ya ku̱hu̱ti̱ya Mukama.
12 Okubbala kuukala oli mwomi̱i̱li̱
kandi kweghonjela mu bwomi̱i̱li̱ bukani̱ye?
13 Nuwaabbali̱ye kuba na bwomi̱i̱li̱ bukani̱ye
kandi kukula-kulana,
weelinde kanu̱wa kaawe kutabu̱gha bintu bi̱bhi̱i̱hi̱ye
kandi kutaha bisubha.
14 Oleke kukola bintu bi̱bhi̱i̱hi̱ye kandi okole bilungi.
Obbalaghe kuukala mpempa bwile bwona.
15 Mukama akuukalagha ataaye maaso ghe haa bahi̱ki̱li̱i̱ye
kandi matui ghe ghaku̱u̱ghu̱wagha kutakangana kwabo.
16 Bhaatu Mukama oohi̱ye abakukolagha bintu bi̱bhi̱i̱hi̱ye,
niikuwo mbaaku̱u̱ye batalitodha kubaasukila.
17 Mukama aku̱u̱ghu̱wagha bantu be, abakumubilikilagha kubakoonela.
Akubacungulagha ku̱lu̱gha mu bijibu byabo byona.
18 Mukama akuukalagha haai abatuntuuye haa mitima,
akujunagha abatali na kunihila.
19 Muntu ahi̱ki̱li̱i̱ye akutungagha bijibu bikani̱ye,
bhaatu Mukama akumujunagha biyo byona.
20 Mukama akumulindagha kwonini,
eku̱wa liye na limui kutahendeka.
21 Bintu bi̱bhi̱i̱hi̱ye bikwitagha oghu akubikolagha
kandi aboohi̱ye muntu oghu ahi̱ki̱li̱i̱ye balifubiluwa.
22 Mukama akujuna bantu be,
taaliyo weena oghu akumuulukilaghʼo ali̱twi̱lu̱wa musango.