35
Nsaala ya kusaba bu̱kooneli̱
Jabbu̱li̱ ya Dhau̱dhi̱.
1 Ai̱ Mukama, ohakani̱ye abakwete kumpakani̱ya
kandi olwani̱i̱si̱ye abakwete kundwani̱i̱si̱ya.
2 Olu̱waale kyakulwani̱i̱si̱ya kyawe kandi okwate ngabo yaawe.
Weeteekani̱je kulwana kandi wiise onkoonele.
3 Okwate eti̱mu̱ lyawe na ndyankui yaawe,
olwani̱i̱si̱ye abakwete kumpuma.
Ongile oti,
“Ni̱i̱syoni Mu̱ju̱ni̱ waawe.”
4 Oleke abakubbala kunjita basi̱ngu̱lu̱we kandi bahemuke.
Obaku̱u̱ki̱ye enu̱ma kandi basobeluwe.
5 Oleke babe nga bisunga ebi mpwegha ekwete ku̱hu̱ngi̱ya,
malai̱ka wa Mukama naanabahuma.
6 Oleke kihanda kyabo kibemu mweli̱ma kandi butelelo,
malai̱ka wa Mukama naanabahiigha.
7 Tandi nʼeki nabasobeleei̱ye, bhaatu bakunteghelagha bi̱ki̱ya
kandi baalima ki̱i̱na kyakunkwatilamu.
8 Oleke bahwelekeelele batamani̱ye,
oleke bi̱ki̱ya bantegheeye haaliibo baakwatuwamu
kandi ki̱i̱na balimiiye si̱ye haaliibo bengengamu bahwelekeelele.
9 Du̱mbi̱ nkudheedhuwa haabwa Mukama,
nsemeeleluwe nanga anju̱ni̱ye.
10 Nku̱bu̱gha na mutima ghwanje ghwona nti,
“Ai̱ Mukama, taaliyo oghu akwengaane.
Okucungulagha baceke haa baamaani̱
kandi banaku haa bakubabona-boniyagha.”
11 Baakai̱so abali nʼetima bakuumukagha
kandi batandika kuntʼo misango eghi ntamani̱yʼo na kantu.
12 Nkubakolagha kulungi,
ebo bankola kubhi, baamali̱ye si̱ye maani̱.
13 Obu baabaagha balwaye,
nkalu̱wala ngoye sya bujune kandi naasi̱i̱ba haabwabo,
majima kuwo naabasabilagha.
14 Naabasabilagha ngoku nangusabila bhootu̱ syanje kedha lughanda lwanje.
Neeghunga haabwabo ngoku nangweghungila maaha eenini.
15 Bhaatu obu naabaagha mu bijibu,
ebo baadheedhuwa kandi beegumbaani̱ya kunsekeelela,
na bantu aba ntamani̱ye baakala kundwani̱i̱si̱ya.
16 Baakala mbanambaki̱i̱si̱ya
kandi mbanansekeelela, mbaneenena ngaga.
17 Ai̱ Mukama oku̱hi̱ki̱ya dhi̱ kuukala onandoli̱ye kwonkaha?
Onjune abakwete ku̱ndu̱mba aba,
abali nga ntale.
18 Du̱mbi̱ nku̱ku̱si̱i̱ma mu kusanga-sangaana kwa bantu baawe.
Nkukusinda mu maaso ghaa bantu boona.
19 Otaleka ngi̱ghu̱ syanje mbaneepankilʼo,
otaleka abanjohi̱ye batali na kighendeleluwa aba,
mbadheedhuwa haabwa kusaaliluwa kwanje.
20 Baku̱bu̱ghagha bighambo ebikusaali̱ja baanakyabo
kandi badimaaga bantu abakubbalagha kuukala mu bu̱si̱nge.
21 Bakwangu̱u̱yagha kunyegheelela, mbaghila bati,
“Waaki̱koli̱ye! Etu̱we boonini twakyeboneeye.”
22 Bhaatu uwe Mukama, ebi byona obiboone, otaholi̱ya.
Ai̱ Mukama otanselʼo.
23 Oomuke, ontwi̱le musango ngoku ntasobeei̱ye,
ondwanilile Mukama Luhanga wanje.
24 Ai̱ Mukama oli oghu Ahi̱ki̱li̱i̱ye, nahabweki ongilemu oghu atali na musango.
Otaleka ngi̱ghu̱ syanje mbansekeelela haabwa bijibu byanje.
25 Otaleka mbaghila bati, “Twamweju̱ni̱ye!
Eki niikiyo twakabbalagha!”
26 Oleke abadheedheeu̱we haabwa bijibu byanje,
bahuwe maani̱ kandi bahemuke.
Oleke abakwete kughila bati bansaai̱ye
bahemuke kandi ki̱ti̱i̱ni̱sa kibahuwe.
27 Oleke boona abakubbala bati nsi̱ngu̱le badheedhuwe.
Ku̱lu̱gha endindi na kweyongelayo baghilaghe bati,
“Mukama ni wamaani̱,
akudheedhuwagha mu̱heeleli̱ya wee akaakubaagha kulungi.”
28 Du̱mbi̱ nkulangilila bu̱hi̱ki̱li̱i̱le bwawe
kandi niikalaghe ninkusinda kilo kyona.