36
Kukunda kwamaani̱ kwa Luhanga
Ewaa mukulu wa bilimbo. Jabbu̱li̱ ya Dhau̱dhi̱ mu̱heeleli̱ya wa Mukama.
1 Kibhi ki̱ku̱bu̱ghagha na bantu babhi kitobheeye kwonini mu mutima yabo.
Tabakwobahagha Luhanga.
2 Bakwebu̱ghaghʼo munu ngoku bali balungi,
tabakugubha kumanya kedha kwoha bibhi byabo.
3 Baku̱bu̱ghagha na kanu̱wa kaabo bintu bi̱bhi̱i̱hi̱ye kandi bya bisubha.
Tabakukolagha kintu kyona kya magheji kandi kilungi.
4 Nankabha haa malili ghaabo bakuhanuulagha bi̱bhi̱i̱hi̱ye,
bakwehaaghayo ku̱si̱i̱sa
kandi tabakubhengagha kintu kyona eki̱sobi̱ye.
5 Mukama, kukunda kwawe ku̱hi̱ki̱ye eghulu,
bwesighibuwa bwawe bwamalakaka mu mwanya.
6 Bu̱hi̱ki̱li̱i̱le bwawe buli nga myena ekangamiiye kimui,
bwengani̱ja bwawe buli nga kutobheela kwamaani̱ kwa nanja.
Mukama nuuwe okulindagha bantu kandi bisolo.
7 Ai̱ Luhanga, kukunda kwawe kwamaani̱ ni kwa muhendo.
Bantu bakuulukilagha mu ki̱i̱ku̱dhu̱ kya mapapa ghaawe.
8 Byokuliya bikani̱ye okubahaagha mu numba yaawe bikubaaku̱ti̱yagha
kandi okulekagha banuwa maasi aghakusenda
ku̱lu̱gha ewaawe aghakulekagha badheedhuwa.
9 Nuuwe nsulo ya bwomi̱i̱li̱
kyeleeli̱ kyawe kikulekagha tubona kyeleeli̱.
10 Weeyongele kwoleka kukunda kwawe kwamaani̱ abakumani̱ye.
Okolele bilungi bantu baawe abali na mitima esemeeye.
11 Otasi̱i̱mi̱lani̱ya bantu abali na myepanko kundwani̱i̱si̱ya
kedha mikono ya bantu babhi kuleke ni̱ndi̱gi̱ta.
12 Olole bantu babhi aba balangaaye hansi,
beegengi̱ye, tabakutodha kuumuka.