37
Kwesigha Mukama
Jabbu̱li̱ ya Dhau̱dhi̱.
1 Oleke kutuntula haabwa bantu babhi,
kedha kughilila etima abaku̱sobi̱yagha,
2 nanga bakwoma bwangu nga bi̱si̱ngo
kandi baku̱we bwangu nga bimole.
3 Weesighe Mukama kandi okole bilungi!
Nsi ekuba yaawe kandi okuukalamu kusemeeye.
4 Odheedheluwe mu Mukama
kandi akukuha ebi mutima ghwawe ghukubbala.
5 Ohe Mukama ebi okwete kukola byona.
Omwesighe kandi akukukoonela.
6 Akuleka bu̱hi̱ki̱li̱i̱le kandi bwengani̱ja bwawe,
biboneke bbeni̱-bbeni̱ nga musana ghwa ntangaali̱.
7 Mu̱gu̱mi̱si̱li̱je kandi mwesighe Mukama,
mutoobaha abakwete kukula-kulana haabwa ntegheka syabo si̱bhi̱i̱hi̱ye.
8 Muleke kusaaliluwa, kukwatuwa ki̱i̱ni̱gha kandi kwobaha,
nanga ebi bikuleetagha bijibu.
9 Bantu babhi balihwelekeelela,
bhaatu abataaye kunihila kwabo mu Mukama bakugwetuwa nsi.
10 Bantu babhi bakuhuwʼo bwangu kandi tabakutodha kuboneka,
nankabha obabbala, tookugubha kubabona.
11 Bhaatu abadhooti̱ bakugwetuwa nsi,
baakale mpempa kandi bakula-kulane.
12 Bantu babhi bakuteghekagha kukola kubhi bantu bahi̱ki̱li̱i̱ye.
Bakuukalagha mbabeenenela ngaga haabwa kubooha.
13 Bhaatu Mukama akusekeelelagha bantu babhi aba
kandi amani̱ye ngoku bwile bwa kubatwi̱la musango buli haai ku̱hi̱ka.
14 Babhi bakukwatagha bihiyo
kandi babhula mata ghaabo,
kwita banaku kandi na abali mu bwetaagho.
Bakusalagha haa mumelo bantu abakukolagha ebi̱hi̱ki̱ye.
15 Bhaatu baliituwa bihiyo byabo ebi byonini
kandi mata ghaabo agha ghalibheghanguka.
16 Nkilungi kutunga bintu bikee oli muntu mulungi,
kusaali̱ya kuba muguudha oli muntu mubhi.
17 Mukama aliiyʼo bantu babhi aba maani̱ agha bali nagho
kandi alinde kusemeeye bantu balungi.
18 Mukama akulindagha bu̱li̱ kilo abamu̱hu̱ti̱i̱ye
kandi bugwetuwa bwabo aabahaaye bukuba bwa bilo nʼebilo.
19 Tabaliba na bijibu mu bwile bu̱bhi̱i̱hi̱ye
kandi baliba na byokuliya bikani̱ye mu bwile bwa njala.
20 Bantu babhi ni ngi̱ghu̱ sya Mukama
kandi balihuwo nga bi̱si̱ngo bookeei̱ye mu musili kandi nga mwi̱ka.
21 Muntu mubhi akweholi̱yagha kandi atasasula,
bhaatu muntu mulungi akubaagha mwenge kandi aha baanakiye.
22 Aba Mukama akuha mu̱gi̱sa niibo bakugwetuwa nsi,
bhaatu aba akukiina balihwelekeelela.
23 Mukama niiye akuhikilagha bantu mu kihanda eki babhonganuuwe kukwamamu
kandi akulindagha abakukolagha ebi̱mu̱dheedhi̱ye.
24 Kaakuba eegenga, taakwegengela kimui,
nanga Mukama akumukoonela amu̱u̱mu̱ki̱ye.
25 Ku̱lu̱ghi̱i̱li̱la mu bwana ku̱hi̱ki̱ya nʼendindi obu naakaakula,
tankabonagha Mukama alu̱ghi̱yʼo bantu balungi,
kedha baana baabo mbasaba-saba bantu byokuliya.
26 Bwile bwona bakuheelagha busa kandi beeholi̱ya baanakyabo,
ti̱ baana baabo bakubabeelagha baa mu̱gi̱sa.
27 Muleke kukola bintu bi̱bhi̱i̱hi̱ye kandi mukole bilungi,
du̱mbi̱ mukuukala munsi bilo nʼebilo.
28 Mukama akubbalagha bwengani̱ja
kandi taaku̱lu̱ghʼo bantu be abamwesi̱ghi̱ye.
Akubalinda bilo nʼebilo,
bhaatu baana baa bantu babhi balihwelekeelela.
29 Bantu bahi̱ki̱li̱i̱ye bakugwetuwa nsi
kandi baghiikalemu bilo nʼebilo.
30 Kanu̱wa kaa muntu ahi̱ki̱li̱i̱ye kaku̱bu̱ghagha ebilimu magheji
kandi kilimi kiye kighamba ebilimu bwengani̱ja.
31 Akukwatagha bilaghilo bya Luhanga haa mutima ghuwe
kandi tabi̱ku̱mu̱lu̱ghaghʼo.
32 Bantu babhi bakwebi̱si̱i̱li̱lagha muntu mulungi,
mbabbala kumwita.
33 Bhaatu Mukama takumuleka mu maani̱ ghaa bantu babhi aba,
kedha musango ku̱si̱nga muntu mulungi obu bakuba mbamutongani̱ya.
34 Ote kunihila kwawe mu Mukama
kandi ookale mu kihanda kiye.
Aku̱ku̱hu̱ti̱ya naakugweta nsi
kandi okubona ngoku akubhingamu bantu babhi.
35 Nkabona muntu mubhi kandi asaakaaye,
neeyongela kuba na maani̱ nga kiti haa etaka lisemeeye.
36 Bhaatu obu naatodhi̱ye kulola, naasanga ataliyo!
Nankabha ninaamubbali̱ye, tanaamuboone.
37 Olole haa bantu baa majima kandi balungi,
baliba na mpempa kandi batunge baasukulu.
38 Bhaatu bantu babhi balihwekeelela
kandi tabaliba na baasukulu.
39 Mukama akujunagha bantu bahi̱ki̱li̱i̱ye
kandi abalinda mu bwile bwa bijibu.
40 Mukama akubakoonelagha kandi aabacungula,
akubajunagha bantu babhi,
nanga niiye bakuulukilaghʼo kubalinda.