38
Nsaala ya muntu oghu akwete kubona-bona
Jabbu̱li̱ ya Dhau̱dhi̱, haabwa kihonguwa kya kuusukilʼo.
1 Ai̱ Mukama, otanfubila osaaluuwe,
kedha kumpana oli na ki̱i̱ni̱gha.
2 Wantu̱bhi̱ti̱ye na bimala byawe
kandi wampuula na mukono ghwawe neegenga hansi.
3 Naalwaye haabwa ki̱i̱ni̱gha kyawe,
maku̱wa ghanceki̱ye haabwa bibhi byanje.
4 Bibhi byanje byamali̱ye si̱ye maani̱,
bili nga nku̱mba eghi ntaakugubha kuheeka.
5 Bibbodhe byanje byagu̱ndi̱ye kandi niibuwo byanu̱nka,
haabwa budhoma bwanje.
6 Busaali̱ji̱ bwampingulaane kandi bwangombi̱ya hansi,
nkumalagha kilo kyona ni̱neeghu̱ngi̱ye.
7 Ndwaye mu̱swi̱ja ghwamaani̱
kandi ndi haai ku̱ku̱wa.
8 Maani̱ ghoona ghampooye mu mubili,
haabwa bijibu ebi ndi nabiyo.
9 Ai̱ Mukama, ebi nkubbalagha byona obimani̱ye
kandi oku̱u̱ghu̱wagha kwehu̱mi̱ya kwanje.
10 Mutima niibuwo ghwanteela munda,
maani̱ ghampooye kandi maaso ghanjighala.
11 Baabhootu̱ na aba nkuukalagha nabo bandu̱ghi̱yʼo haabwa bibbodhe byanje.
Baliilanuwa banje bakuukalagha banseli̱yʼo.
12 Abakwete kubbala kunjita bakunteghelagha bi̱ki̱ya,
abakubbalagha kumputaali̱ya aba,
bakuukalagha bwile bwona mbeeli̱li̱kanʼo ntegheka syabo ku̱mpwelekeeleli̱ya.
13 Naafooki̱ye nga muntu matui ghaaghaaye oghu ataaku̱u̱ghu̱wagha
kandi oghu kanu̱wa kaaghaaye, oghu ataaku̱bu̱ghagha.
14 Naafooki̱ye nga muntu ataaku̱u̱ghu̱wagha
kandi oghu ataaku̱bu̱ghagha kwetonganʼo.
15 Ai̱ Mukama, nuuwe nkulindilila
kandi uwe, Ai̱ Mukama Luhanga wanje, okukuukamu haabwanje.
16 Otaleka ngi̱ghu̱ syanje mbadheedhuwa haabwa kubona-bona kwanje
kandi mbeepanka haabwa kughuwa kwanje.
17 Ndi haai kusaaghuwa,
busaali̱ji̱ bwampingulaane.
18 Nkwatulagha nsobi̱ syanje ewaawe
kandi bibhi byanje bikulekagha niikala ntuntuuye.
19 Ndi na ngi̱ghu̱ sikani̱ye kandi bali na maani̱,
banjohi̱ye batali na kighendeleluwa.
20 Aba nkukolagha kulungi ebo bakunkolagha kubhi,
bakubbalagha eki bakunyegheelelʼo,
nankabha ninkubbalagha kukola ebi̱hi̱ki̱ye.
21 Ai̱ Mukama,
otandu̱ghʼo kandi otanselʼo Luhanga wanje.
22 Ai̱ Mukama, Mu̱ju̱ni̱ wanje,
wiise bwangu onkoonele.