39
Nsaala ya kusaba kughaniluwa
Ewaa mukulu wa bilimbo Yedu̱tu̱u̱ni̱. Jabbu̱li̱ ya Dhau̱dhi̱.
1 Nkaghila nti, “Nkwelinda mu ebi nkukola,
neetantanle ku̱si̱i̱sa mu ebi nku̱bu̱gha,
nkwelinda kanu̱wa kanje
kandi bantu babhi balakabaagha bali haai-haai nanje ndaholi̱yagha.”
2 Nkaakala mpoleei̱ye,
ntaaku̱bu̱gha kantu koona kalungi.
Bhaatu kubona-bona kwanje kwakala nkuneeyongela,
mutima ghwansaalila munda.
3 Obu naabyeli̱li̱kanaghʼo munu, mulilo ghwanjaka munda,
niibuwo naaghi̱li̱ye nti,
4 “Mukama, oleke nimanye bwile nku̱kwi̱lamu
kandi na muhendo ghwa bilo byanje,
oleke nimanye ngoku bwomi̱i̱li̱ bwanje buli haai kuhuwʼo.”
5 Waadi̱i̱di̱i̱ye kwonini bwomi̱i̱li̱ bwanje,
mu maaso ghaawe bwomi̱i̱li̱ ni kantu kati̱i̱,
majima, bantu ni lwoha kwonkaha.
6 Tuli byelu̱ghu̱u̱li̱li̱ya kwonkaha bikubunga
kandi ebi tukwanguwagha kukola tabili na mughaso.
Muntu akubiikagha etungo likani̱ye anaakaaye,
bhaatu akaku̱ku̱waagha takumanyagha oghu akulitwala.
7 Nahabweki Mukama, buuye kunihila kwanje nkukuta haa?
Kunihila kwanje kuli mu uwe.
8 Onjune bibhi byanje byona
kandi otaleka bantu badhoma mbampwawaani̱ya.
9 Okantwalikani̱ya otiyo, bhaatu naakala ni̱holeei̱ye,
ntaaku̱bu̱gha na kighambo kyona.
10 Otatodha kweyongela kunfubila,
ndi haai ku̱ku̱wa haabwa kumpuula na mukono ghwawe.
11 Okaakubaagha noofubila bantu haabwa bibhi byabo,
byona ebi babbali̱ye okubimalaghʼo nga nenje,
majima bantu ni lwoha kwonkaha.
12 Ai̱ Mukama, ooghu̱we kusaba kwanje,
otegheeleli̱ye kutakangana kwanje haabwa bu̱kooneli̱.
Oteehighali̱i̱si̱ya matui haa kulila kwanje.
Ndi mu̱ghenu̱ waawe
kandi nkwete kusaala kwonkaha ngoku baataata banje baabaagha.
13 Ondeke nenkaha, niikuwo ndheedhuwʼo kati̱i̱,
ntakaku̱u̱ye kandi nihuwʼo.