40
Nsaala ya kusaba bu̱kooneli̱
Ewaa mukulu wa bilimbo. Jabbu̱li̱ ya Dhau̱dhi̱.
1 Nkagu̱mu̱si̱li̱ja naalindilila Mukama kunkoonela.
Antegheeleli̱ya kandi aaghu̱wa kutakangana kwanje.
2 Anjiya mu ki̱i̱na kya kabhi munu,
anjiya mu bisaabo.
Aani̱i̱ni̱ya haa kikuka kikangami̱ye
kandi ampa etaka lyomiiye lya kwemililʼo.
3 Akata kilimbo kihyaka mu kanu̱wa kanje,
kilimbo kya kusinda Luhanga waatu.
Bantu bakani̱ye bakubona eki, bahu̱ti̱ye Mukama
kandi bamwesighe.
4 Ali na mu̱gi̱sa oghu akwesighagha Mukama,
oghu ataakubbalagha abali na myepanko
kandi abakulami̱yagha baaluhanga banji.
5 Mukama Luhanga wanje,
otukoleeye byakuswekani̱ya bikani̱ye.
Oli na ntegheka sikani̱ye haabwatu
kandi taaliyo oghu akwengaane.
Nkaakulengaghʼo kuusuka byakuswekani̱ya ebi okukolagha,
tankubimalaghayo bbaa.
6 Tookubbalagha bihonguwa kandi bisembo,
tookusabagha bantu bihonguwa byona byokeei̱ye kedha bihonguwa bya kuuyʼo bibhi,
bhaatu okampa matui ghaaghu̱li̱ki̱ye ku̱ku̱u̱ghu̱wa.
7 Niibuwo naaghi̱li̱ye nti, “Ndi hani, naasi̱ye,
ngoku kimpandi̱i̱ku̱u̱wʼo mu Ebyahandi̱i̱ku̱u̱we.
8 Luhanga wanje, nkudheedhuwagha kukola kusighikila haa ntegheka yaawe,
bilaghilo byawe mbikwete haa mutima ghwanje.”
9 Nkulangililagha mu kusanga-sangaana kwa bantu bakani̱ye bikoluwa byawe bya kujuna.
Mukama, omani̱ye ngoku ntaakuukalagha mpoleei̱ye.
10 Tankubisagha bu̱hi̱ki̱li̱i̱le bwawe haa mutima ghwanje,
nkughambilagha bantu bwesighibuwa bwawe kandi ngoku okubajunagha.
Nkughambilagha boona mu kusanga-sangaana kwa bantu baawe,
haa kukunda kwawe kwamaani̱ kandi bwesighibuwa bwawe.
11 Mukama, nimani̱ye ngoku otaakuleka kungilila kisa,
kukunda kwawe kwamaani̱ kandi bwesighibuwa bwawe bikundinda.
12 Bijibu bikani̱ye ebi ntaakugubha kubala bi̱neeli̱ghi̱li̱i̱ye,
bibhi byanje bimpingulaane kandi tankugubha kubona kahanda kaa ku̱bi̱lu̱ghamu.
Bibhi ebi bisaaye muhendo ghwa esoke lya mutuwe ghwanje
kandi maani̱ ghampooye.
13 Mukama, gutu onjune!
Mukama, wiise bwangu onkoonele!
14 Oleke aba boona abakubbala kunjita
bahemuke kandi basobeluwe,
oleke aba boona abadheedheeu̱we haabwa bijibu byanje,
bakuuke enu̱ma baswaji̱bu̱u̱we.
15 Oleke boobahe, nsoni̱ sibakwete,
abakungilagha bati, “Ahaa! Twamu̱gu̱bhi̱ye!”
16 Bhaatu oleke boona abakukubbalagha
badheedhuwe kandi basemeeleluwe.
Oleke abaku̱ku̱si̱i̱magha haabwa kubajuna, baghilaghe bati,
“Mukama ni mukulu!”
17 Si̱ye ndi munaku kandi museeghe,
bhaatu oleke Mukama anjikali̱ye mu biteekelejo biye.
Mukama, nuuwe mu̱kooneli̱ wanje kandi mu̱ju̱ni̱ wanje.
Ai̱ Luhanga wanje, otakeesekeeleluwa kunkoonela!