41
Nsaala mu bulwaye
Ewaa mukulu wa bilimbo. Jabbu̱li̱ ya Dhau̱dhi̱.
1 Bali na mu̱gi̱sa abakughililagha kisa banaku,
Mukama akubakoonela mu bwile bwa bijibu.
2 Mukama akubalinda kandi aleke baakale bali boomi̱i̱li̱.
Akuleka bakula-kulane munsi kandi abacungule ku̱lu̱gha mu ngi̱ghu̱ syabo.
3 Mukama akubakoonela mbaabaaye balwaye
kandi abaki̱li̱ye babe boomi̱i̱li̱.
4 Ai̱ Mukama, nkasaba nti, “Ongilile kisa kandi onki̱li̱ye,
nanga nkasi̱i̱sa ewaawe.”
5 Ngi̱ghu̱ syanje bakwete ku̱mbu̱ghʼo kubhi,
bakubbala nku̱we kandi bantu banjibuululuwe.
6 Bakaakwisagha kundola, batandika ku̱bu̱gha bisubha,
kuni haa mitima yabo bali nʼetima,
ti̱ mbandu̱ghʼo baghenda mbankoka.
7 Boona abanjohi̱ye bakuhwewelelanagha hamui mbambu̱ghʼo,
bahanuula kunkola kubhi.
8 Bakughilagha bati, “Alwaye kwonini,
taakugubha kutodha kuumuka haa bulili bbaa.”
9 Nankabha bhootu̱ syanje
neesi̱ghi̱ye kwonini,
oghu twaliyagha naye sahaani̱ emui,
niiye aabaaye ngi̱ghu̱ yanje.
10 Mukama, ongilile kisa, onki̱li̱ye,
niikuwo nanje nkole ngi̱ghu̱ syanje ngoku ebo bankoli̱ye.
11 Nimani̱ye ngoku nkukolagha ebi̱ku̱dheedhi̱ye
kandi tooku̱si̱i̱ma ngi̱ghu̱ syanje mbansi̱ngu̱la.
12 Nuuwe okulindagha bwomi̱i̱li̱ bwanje, nanga oboone ngoku ntali na musango,
wansi̱mi̱lani̱i̱ye kwisa mu maaso ghaawe bilo nʼebilo.
13 Mu̱si̱i̱me Mukama Luhanga wa I̱saaleeli̱,
kutandikila endindi kandi bilo nʼebilo.
Aami̱i̱na kandi Aami̱i̱na!