KITABO KYAKABILI
42
(Jabbu̱li̱ 42—72)
Kubbala Luhanga
Ewaa mukulu wa bilimbo. Kilimbo kya Banakoola.*42:0 Banakoola bakaba bali baa ntu̱la ya bahongi̱ abaabaagha bakomeeu̱we kwebembela bilimbo, mwebembeli̱ wabo wʼoku̱du̱bha baamughilaghamu Koola.
1 Ai̱ Luhanga, ngoku mpala ekubbalagha maasi ghakusenda,
niikuwo mwoyo ghwanje ghukwete kukubbala.
2 Ndi nʼeliyo lya kuba mu bumui na Luhanga, Luhanga mwomi̱i̱li̱.
Nkughenda dhi̱ kwemilila mu maaso ghe?
3 Mali̱gha niigho ghabaaye byokuliya byanje bya ntangaali̱ na mukilo
kandi ngi̱ghu̱ syanje bakuukalagha mbangila bati,
“Luhanga waawe ali haa?”
4 Mutima ghukunsaalilagha munda nkaakuusukagha,
obu naaghendi̱ye na ki̱bbu̱la kya bantu mu numba ya Luhanga kulami̱ya
kandi naabahikila obu twalubhatangagha tu̱dheedheeu̱we,
ntulimba nʼelaka lyamaani̱ kusinda Luhanga.
5 Mwoyo ghwanje ghutuntuuye nangaaki?
Kandi eki̱leki̱ye ghutanteekaana munda nkiki?
Nkuta kunihila kwanje mu Luhanga,
nanga nkutodha kumusinda,
eye oghu ali Mu̱ju̱ni̱ wanje kandi 6 Luhanga wanje.
Si̱ye maani̱ ghampooye kwonini,
bhaatu nkukuusukagha ku̱lu̱ghi̱i̱li̱la hambali maasi Yolodaani̱ ghatandikiiye,
haa mwena Helu̱mooni̱ kandi haa mwena Mijila.
7 Mighina yamaani̱ ya maasi ghaawe ghasuuye
kandi biijulumba byamaani̱ byansendeei̱ye.
8 Ntangaali̱ Mukama akunjolekagha kukunda kuwe kwamaani̱
kandi mukilo nimulimbila bilimbo biye.
Nsaba ntiyo Luhanga oghu akumpaagha bwomi̱i̱li̱.
9 Nkughilagha Luhanga wanje, oghu ali kikuka kyanje nti,
“Ekyaleki̱ye wanjibululuwa nkiki?
Ngi̱ghu̱ syanje sikwete kweyongela kumbona-boni̱ya nangaaki?”
10 Maku̱wa ghakuukalagha ngansaalila haabwa kuunambula kwabo,
nanga bakuukalagha mbambu̱u̱li̱ya bati,
“Luhanga waawe ali haa?”
11 Mwoyo ghwanje ghutuntuuye nangaaki?
Kandi eki̱leki̱ye ghutanteekaana munda nkiki?
Nkuta kunihila kwanje mu Luhanga,
nanga nkutodha kumusinda,
eye oghu ali Mu̱ju̱ni̱ wanje kandi Luhanga wanje.
*^ 42:0 Banakoola bakaba bali baa ntu̱la ya bahongi̱ abaabaagha bakomeeu̱we kwebembela bilimbo, mwebembeli̱ wabo wʼoku̱du̱bha baamughilaghamu Koola.