44
Nsaala ya kusaba bu̱kooneli̱
Ewaa mukulu wa bilimbo. Kilimbo kya Banakoola.
1 Ai̱ Luhanga, tukaaghu̱wa na matui ghaatu,
ebi baataata baatu baatughambiiye,
byakuswekani̱ya ebi waakoli̱ye bwile baabaaghʼo,
mu bilo bya hambele.
2 Okabhinga na mukono ghwawe bantu baa mu mahanga,
bantu baawe waabata mu kyalo eki.
Okafubila bantu baa mahanga ghanji,
bhaatu bantu baawe waabaha bughabe.
3 Bantu baawe tabaasi̱ngu̱u̱ye kyalo eki haabwa bihiyo byabo,
taghali maani̱ ghaabo aghaaleki̱ye baakitwala.
Bukaba bu̱toki̱ bwamaani̱ ghaa mukono ghwawe ghwabuliyo
kandi kyeleeli̱ kya maaso ghaawe,
nanga okabakunda.
4 Nuuwe Mukama wanje kandi Luhanga wanje,
nuuwe okuhaagha bu̱si̱ngu̱li̱ bantu baa Yakobbo.
5 Haabwa maani̱ ghaawe tukugengagha hansi ngi̱ghu̱ syatu
kandi mu li̱i̱na lyawe tubakpeetaaga.
6 Si̱ye tankwesighagha buta bwanje,
kedha kihiyo kyanje kunjuna.
7 Bhaatu nuuwe okatujuna ngi̱ghu̱ syatu
kandi waahemula aboohi̱ye etu̱we.
8 Tukwepankilagha mu Luhanga bwile bwona
kandi tukusindagha li̱i̱na lyawe bilo nʼebilo.
9 Bhaatu endindi waatu̱lu̱ghi̱yʼo kandi waaleka twahemuka,
tookyaghenda na baasilikale baatu haa bulemo.
10 Okaleka twali̱gi̱ta ngi̱ghu̱ syatu
kandi ebo beetwalila bintu byatu byona.
11 Okaleka baatusala nga ntaama
kandi waatulalangi̱ya mu mahanga ghanji.
12 Okaghu̱li̱ya bantu baawe haa muhendo ghukee munu
kandi tawaatu̱ngi̱yemu maghobo.
13 Waaleki̱ye baliilanuwa baatu baatuwaawaani̱ya,
niibuwo baatusekeelela kandi baatughaya.
14 Waaleki̱ye bantu baa mahanga ghanji baatubbaaki̱i̱si̱ya
kandi bakutusekeelelagha, mbanadhi̱ngi̱ya mituwe yabo.
15 Si̱ye bwile bwona nkwehi̱ghu̱wagha mpemu̱ki̱ye
kandi ndi na nsoni̱.
16 Nku̱u̱ghu̱wagha ebi abanjoi̱ye kandi abakwete kuunambula baku̱bu̱ghagha,
mpemu̱ki̱ye mu maaso ghaa ngi̱ghu̱ syanje kandi na abakubbalagha kunkola kubhi.
17 Bini byona byatubaayʼo nankabha tutaakuubuluuwe,
kedha ku̱tu̱wa ndaghaano eghi waakoli̱ye naatu.
18 Mitima yaatu teekakughayagha
kandi tatukalu̱ghagha mu kihanda kyawe.
19 Bhaatu waatuleka tutali na mu̱kooneli̱ mu mbuwa sya mu kisaka,
waatuleka mu kyeli̱ma kyamaani̱.
20 Tatwabuluuwe li̱i̱na lya Luhanga waatu,
kedha ku̱u̱mu̱ki̱ya mikono yaatu kulami̱ya baaluhanga banji.
21 Wangubaaye okimani̱ye,
nanga okumanyagha nankabha ebi tu̱bi̱si̱ye haa mitima yaatu.
22 Haabwawe bakumalagha kilo kyona mbanatwita,
bakututwalikani̱yagha nga ntaama bakughenda kusala.
23 Ai̱ Mukama, oomuke! Waaghwesaghiiye nangaaki?
Osu̱su̱mu̱ke, otatubhenga bilo nʼebilo!
24 Waatwebi̱si̱li̱i̱ye nangaaki?
Waabuluuwe kubona-bona kandi bijibu byatu nangaaki?
25 Baatu̱gengi̱ye hansi
kandi tatukugubha kuumuka.
26 Oomuke, wiise otukoonele!
Otucungule haabwa kukunda kwawe kwamaani̱.