45
Kilimbo haa kuswela kwa mu̱lemi̱
Ewaa mukulu wa bilimbo. Kilimbo kya kukunda kya kulimbuwa mu elaka lya “Bimole.” Jabbu̱li̱ ya Banakoola.
1 Mutima ghwanje ghuusuuyemu bighambo bisemeeye ebi nkulimbila mu̱lemi̱.
Nku̱koleesi̱ya elaka lyanje ngoku muhandi̱i̱ki̱ mulungi aku̱koleesi̱yagha peeni̱.
2 Nuuwe osemeeye kusaali̱ya basaasa boona.
Oku̱bu̱ghagha bighambo bya kisa.
Nahabweki Luhanga akuhaaye mu̱gi̱sa bilo nʼebilo.
3 Uwe oghu oli na bu̱toki̱ bwona, weebohe kihiyo kyawe haakpengbu̱ ya kibelo kyawe,
oli na ki̱ti̱i̱ni̱sa kandi bukulu.
4 Mu ki̱ti̱i̱ni̱sa kyawe, oghende oni̱i̱ni̱ye haa nkai̱na nga mu̱si̱ngu̱li̱,
kulwanilila majima, bu̱dhooti̱ kandi bwengani̱ja.
Okole na mukono ghwawe ghwabuliyo bintu ebikwobahi̱i̱li̱li̱ya.
5 Bimala byawe byoghiiye, bikuhutaali̱yagha mitima ya ngi̱ghu̱ syawe
kandi bantu baa mu mahanga bakwengengagha mu maghulu ghaawe.
6 Ai̱ Luhanga, ntebe yaawe ya bukama ni ya bilo nʼebilo
kandi mwi̱gho ghwawe ghwa bukama ni ghwa bwengani̱ja.
7 Oku̱ndi̱ye bi̱hi̱ki̱ye kandi wooha bubhi,
nahabweki Luhanga, oghu ali Luhanga waawe,
aaku̱seesi̱yʼo magita ghaa kudheedhuwa kusaali̱ya baanakyawe.
8 Biigandulo byawe bikwete kusasa kisu kisemeeye kya bigita bisasi̱ye bya maasi,
mu bikaali bikwehuwe na maano ghaa njoghu̱,
niimuwo bali̱mbi̱ bakuteelagha du̱ngu̱ kuleka noodheedhuwa.
9 Bahala baa bakama bali mu baghenu̱ baawe baa bi̱ti̱i̱ni̱sa.
Mugholi okuswela aamiliiye haa luhande lwa mukono ghwawe ghwabuliyo.
Alu̱wete kati̱mba kakoleeu̱we mu feeja esemeleeye kimui.
10 Muhala wanje, otegheeleli̱ye bhyani ebi ndimaghenda kukughambila.
Oobululuwe bantu baa ewaanu kandi na baa ka yaanu.
11 Kusemela kwawe kukuleka mu̱lemi̱ akukunde kwonini,
niiye mukama waawe okulaghiluwa ku̱mu̱hu̱ti̱ya.
12 Bantu bʼomu Ti̱lo bakukuleetela bisembo,
bantu baayo baguudha bakulengʼo kukusoona-soona kukola ebi ebo babbali̱ye.
13 Mu̱lemi̱, mugholi okuswela niibuwo aataaha mu kikaali,
asemeleeye kimui kandi alu̱wete kati̱mba kakoleeu̱we mu feeja.
14 Alu̱wete kati̱mba kasemeleeye kimui akali na langi̱ sikani̱ye
kandi niibuwo baamutwala ewaa mu̱lemi̱.
Ali na baana baabukali̱ baanakiye bakani̱ye abamu̱helekeleei̱ye.
15 Boona niibuwo baataaha mu kikaali kya mu̱lemi̱
badheedheeu̱we kwonini.
16 Baasukulu baawe baliba bakama nga baataata baabo.
Olibafoola bakama baa munsi yoona.
17 Bu̱li̱ mujo ghwa bantu balahu̱ti̱yagha li̱i̱na lyawe
kandi mahanga ghoona ghakusinda li̱i̱na lyawe bilo nʼebilo.