46
Luhanga niiye kigho kyatu
Ewaa mukulu wa bilimbo. Jabbu̱li̱ eghi Banakoola baahandi̱i̱ki̱ye, mu elaka likee lya beesiki.
1 Luhanga niiye buulukilo bwatu kandi maani̱ ghaatu,
akuukalagha eeteekani̱i̱je kutukoonela mu bijibu.
2 Nahabweki tatulyobaha nankabha mu̱si̱ki̱ ghudhinga
kandi myena yeegenga haagati ya nanja,
3 nankabha maananja ghaasulila kimui
kandi ghadhinga-dhi̱ngi̱ya myena.
4 Haliyo maasi ghakusenda aghakuleetagha kudheedhuwa mu kibugha kya Luhanga.
Kibugha eki ni ki̱i̱kalo ki̱hi̱ki̱li̱i̱ye hambali wa Eghulu Munu akuukalagha.
5 Luhanga akuukiikalaghamu kandi takilihwelekeelela.
Luhanga akukilindagha ku̱lu̱ghi̱i̱li̱la nkyambisi.
6 Akaaku̱bu̱ghagha nga nkubha, mahanga ghakwobaagha,
makama ghatukumila kandi nsi etandika kunuunuuta.
7 Mukama waamahe ali naatu,
Luhanga wa Yakobbo niiye kigho kyatu.
8 Mwise mulole ebi Mukama akukolagha,
mulole ngoku aku̱hwelekeeleli̱yagha nsi.
9 Akulekagha malemo ghahuwa munsi yoona,
akuhendagha mata na mati̱mu̱
kandi ooki̱ya ngabo mu mulilo.
10 Akughilagha ati, “Mu̱holi̱ye
kandi mumanye ngu ni̱i̱si̱ye Luhanga.
Mahanga ghoona ghakunsinda,
nsi yoona ekunsinda.”
11 Mukama waamahe ali naatu,
Luhanga wa Yakobbo niiye kigho kyatu.