47
Luhanga niiye Mukama wa nsi yoona
Ewaa mukulu wa bilimbo. Jabbu̱li̱ ya Banakoola.
1 Muteele mu ngalo mu̱dheedheeu̱we enu̱we bantu boona,
musinde Luhanga nimulimba bilimbo nʼelaka lyamaani̱.
2 Mukama wa Eghulu Munu, niiye tubhonganuuwe ku̱hu̱ti̱ya,
niiye Mukama mukulu, oghu alemi̱ye nsi yoona.
3 Niiye akaleka twasi̱ngu̱la bantu
kandi aabata hansi ya bighele byatu.
4 Niiye akatugweta kyalo eki tuukaayemu, eki tukwete kwepankilamu,
etu̱we baasukulu baa Yakobbo, aba Luhanga aku̱ndi̱ye.
5 Luhanga aani̱i̱na eghulu bantu mbanagola nʼelaka lyamaani̱,
Mukama aani̱i̱na mbanateela bi̱i̱di̱yo.
6 Mulimbe nimusinda Luhanga, mulimbe nimumusinda,
mulimbe nimusinda Mukama waatu, mulimbe nimumusinda!
7 Luhanga niiye Mukama wa nsi yoona,
mulimbe jabbu̱li̱ ya kumusinda.
8 Luhanga asitami̱ye haa ntebe yee ya bukama ehi̱ki̱li̱i̱ye,
niiye alemi̱ye mahanga ghoona.
9 Balemi̱ baa mahanga bakwekumaani̱li̱yagha hamui na bantu baa Luhanga wa Ebbulahi̱mu̱.
Niiye ali na bu̱toki̱ haa bakama baa munsi.
Bu̱li̱ muntu weena abhonganuuwe ku̱mu̱hu̱ti̱ya.