48
Sayu̱u̱ni̱, kibugha kya Luhanga
Kilimbo. Jabbu̱li̱ ya Banakoola.
1 Mukama ni wamaani̱ kandi abhonganuuwe kumusinda kwonini,
mu kibugha kya Luhanga waatu, haa mwena ghuwe ghu̱hi̱ki̱li̱i̱ye.
2 Sayu̱u̱ni̱, mwena ghusemeeye ghwa Luhanga ghukangami̱ye,
ni kibugha eki Mukama waatu wamaani̱ akuukalaghamu,
kikulekagha bantu baa munsi yoona badheedhuwa.
3 Luhanga akuukalagha mu kibugha eki
kandi eeyoleki̱ye ngoku eye eenini aaniiye mu̱li̱ndi̱ wakiyo.
4 Bakama bakani̱ye bakeekumaani̱ya hamui
kandi baasa kulwani̱i̱si̱ya kibugha eki.
5 Bhaatu obu baakiboone baasweka,
boobaha kandi baali̱gi̱ta.
6 Baatandika kutukumila,
baatunga busaali̱ji̱ ngʼobu mukali̱ akwete ku̱byala akutungagha.
7 Waabahwelekeeleli̱ya nga maati̱ ghaa Talasi̱i̱si̱,
agha mwegha ghwa bu̱lu̱gha ejooba ghwatakaki̱i̱ye.
8 Ebi twaghu̱wagha tukabyebonela etu̱we boonini,
mu kibugha kya Mukama waamahe,
kibugha kya Luhanga waatu,
akukilinda kulungi bilo nʼebilo.
9 Ai̱ Luhanga, tukuukalagha ntweli̱li̱kanʼo kukunda kwawe kwamaani̱
obu tukubaagha ntukulami̱ya mu numba yaawe.
10 Ai̱ Luhanga, bantu babhonganuuwe kukusinda hoona-hoona,
ki̱ti̱i̱ni̱sa kyawe kimalakaki̱ye nsi yoona.
Mukono ghwawe ghwabuliyo ni ghwa bu̱si̱ngu̱li̱.
11 Oleke bantu abali haa mwena Sayu̱u̱ni̱ badheedhuwe,
oleke bantu abaakaaye mu maatau̱ni̱ ghaa mu nsi ya Yu̱da badheedhuwe,
haabwa bwengani̱ja bwawe.
12 Bantu baa Luhanga, mughende mweli̱ghi̱i̱li̱li̱ye kibugha kya Sayu̱u̱ni̱,
mubale ngbaali syamu.
13 Mwetegheeleli̱ye bigho bi̱gu̱mi̱ye byakiyo
kandi musaalile mu manumba ghagu̱mi̱ye aghalimu,
niikuwo mughambile bantu baa mujo oghukulabha enu̱we muti,
14 “Luhanga oni, niiye Luhanga waatu bilo nʼebilo
kandi akutuhikila ku̱hi̱ki̱ya tu̱ku̱u̱ye.”