49
Budhoma bwa kwesigha etungo
Ewaa mukulu wa bilimbo. Jabbu̱li̱ ya batabani̱ baa Koola.
1 Mu̱u̱ghu̱we kini enu̱we bantu boona,
mu̱tegheeleli̱ye, enu̱we boona abaakaaye munsi,
2 enu̱we boona bantu aba bahu̱ti̱i̱ye na aba batahu̱ti̱i̱ye,
baguudha kandi banaku.
3 Nku̱bu̱gha na kanu̱wa kanje ebilimu magheji
kandi ebi nkubaghambila ku̱lu̱gha haa mutima ghwanje mu̱ku̱byetegheeleli̱ya.
4 Nku̱tegheeleli̱ya na kutui kwanje lu̱si̱mo
kandi nsoboolole makulu ghaaluwo mu kilimbo niinateela li̱kembe lyanje.
5 Nkiki kikuleka ninoobaha mu bwile bwa kubona-bona,
obu ngi̱ghu̱ syanje bakuba baneeli̱ghi̱li̱i̱ye?
6 Bakwesighagha buguudha bwabo
kandi beepanka haabwa etungo lyabo.
7 Majima taaliyo muntu oghu akugubha kwecungula,
kedha kuha Luhanga muhendo ghwa sente niikuwo amuleke aakale ali mwomi̱i̱li̱.
8 Bwomi̱i̱li̱ bwa muntu ni bwa bbei̱ yamaani̱,
taaliyo muhendo ghwa sente akugubha kusasula oghukumala,
9 niikuwo aakale ali mwomi̱i̱li̱ bilo nʼebilo
kandi ataku̱wa bamujiika.
10 Tukubonagha ngoku bantu bagheji,
hamui na badhoma baku̱ku̱waagha.
Boona etungo lyabo baku̱li̱ti̱ghi̱lagha bantu banji.
11 Bituulo byabo niigho maka ghaabo bilo nʼebilo,
niiyo bakuukalagha bwile bwona,
nankabha bibanja byabo mbaabilukagha mali̱i̱na ghaabo.
12 Buguudha bwa muntu tabukugubha kumujuna lu̱ku̱,
aku̱ku̱waagha nga bisolo.
13 Eki niikiyo kikubaaghʼo bantu badhoma
kandi abaku̱si̱i̱magha ebi bantu badhoma baku̱bu̱ghagha.
14 Bali nga ntaama esi lu̱ku̱ ali mu̱li̱i̱si̱ya wasiyo,
oghu akubatwala mu kituulo.
Nkyambisi bantu baa Luhanga bakubalubhatangilagha haagu̱u̱li̱,
mi̱ku̱ ya bantu aba enalangaaye ku̱gu̱ndi̱la mu maka ghaayo bituulo.
15 Bhaatu Luhanga akucungula bwomi̱i̱li̱ bwanje
kandi akunjuna ku̱lu̱gha mu maani̱ ghaa lu̱ku̱.
16 Nuwaaboone muntu ali muguudha kandi ku̱hu̱ta kwa ka yee nkweyongela,
eki kitakwobahi̱i̱li̱li̱ya.
17 Naaku̱u̱ye taali na kantu kati̱i̱ aka akutwala
kandi taakughenda eku̱li̱mu̱ na etungo liye.
18 Muguudha anaakaaye akwesi̱i̱magha
kandi bantu bamusinda haabwa kuba kulungi.
19 Bhaatu aku̱ku̱waagha bamujiika akwama baataata be
kandi atatodha kubona kyeleeli̱ kya ntangaali̱.
20 Muntu muguudha bhaatu ateetegheleei̱ye, aku̱ku̱waagha nga bisolo.