50
Luhanga niiye mu̱cu̱ wa misango
Jabbu̱li̱ ya Asafu.
1 Mukama Luhanga wa Bu̱toki̱ Bwona,
aku̱bu̱ghagha kandi aabilikila bantu baa munsi
ku̱lu̱gha bu̱lu̱gha ejooba ku̱hi̱ka bughuwa ejooba.
2 Luhanga akubbyokelelagha ku̱lu̱gha Sayu̱u̱ni̱,
kibugha ekisemeleeye kimui.
3 Luhanga waatu akwisa,
bhaatu taakwisa aholeei̱ye,
mulilo ghwamaani̱ ghukwisa ghumuhikiiye
kandi kyegha kyamaani̱ ki̱mweli̱ghi̱li̱i̱ye.
4 Akubilikila eghulu kandi nsi nga baakai̱so,
kulola ngoku aku̱twi̱la bantu be musango.
5 Akughila ati, “Mukumaani̱ye bantu banje beesighibuwa mubandeetele,
abaakoli̱ye ndaghaano nanje mbahonga kihonguwa.”
6 Eghulu likulangililagha ngoku Luhanga ahi̱ki̱li̱i̱ye,
nanga Luhanga eenini niiye aku̱twi̱la bantu musango.
7 Ai̱ enu̱we bantu banje, mu̱u̱ghu̱we ebi nkwete ku̱bu̱gha,
enu̱we bantu baa I̱saaleeli̱ mu̱tegheeleli̱ye,
ni̱i̱si̱ye Luhanga, Luhanga waanu oghu nkwete kubaghambila ngoku mukukolagha bintu bitahi̱ki̱ye.
8 Tankubasoghosagha haabwa bihonguwa byanu
kandi bihonguwa byona byokeei̱ye ebi mukundeetelagha.
9 Tankwetaaghisibuwa bihonguwa bya ntu̱u̱li̱ sya nte syanu,
kedha bya mbu̱li̱ syanu.
10 Bisolo byona ebili mu ki̱bhi̱li̱ mbyanje
kandi nte syona esili haa bwena lu̱ku̱mi̱ nsyanje.
11 Nimani̱ye noni̱ syona esili haa myena
kandi bihanguwa byona ebili mu kisaka ni byanje.
12 Njala niyaanankwete tankubaghambila,
nanga nsi na byona ebilimu mbyanje.
13 Si̱ye buuye nkuliyagha nyama sya ntu̱u̱li̱ sya nte,
kedha ninuwa saghama ya mbu̱li̱?
14 Oleke kihonguwa kyanu ewaa Luhanga kibe ku̱mu̱si̱i̱ma
kandi muhe wa Eghulu Munu byona ebi mwelaghi̱i̱sani̱i̱ye.
15 Nimwatu̱ngi̱ye kijibu mumbilikile,
nkubajuna kandi du̱mbi̱ mukumpa ki̱ti̱i̱ni̱sa.
16 Bhaatu Luhanga akughilagha bantu babhi ati,
“Nkiki kikulekagha muukaliilila ku̱bu̱ghʼo bilaghilo byanje,
kedha ku̱bu̱gha mu kanu̱wa kaanu haa ndaghaano yanje?
17 Mukubhengagha si̱ye kubahana
kandi mubhenga ebi nkubaghambilagha kukola.
18 Musuma oghu mwakaboone akubaagha bhootu̱ syanu
kandi mukuukalagha hamui na basyani̱.
19 Kanu̱wa kaanu kaasuuyemu bubhi
kandi bisubha byabakana haa kilimi.
20 Mukaakubaagha musitami̱ye mutandika ku̱bu̱ghʼo kubhi baghenji̱ baanu
kandi kukoka baana baa ni̱naanu̱we boonini.
21 Mukwete kukola ebi byona,
si̱ye ninaholeei̱ye,
niibuwo mweli̱li̱kana muti ndi nga enu̱we.
Bhaatu endindi nkubasoghosa kandi mbatʼo musango.
22 Mwekuukemu enu̱we boona abanjibuluuwe,
kitali eki, nkubahwelekeeleli̱ya
kandi taaliyo oghu akubajuna.
23 Kuhaayo ku̱si̱i̱ma kwanu niikiyo kihonguwa eki̱ku̱mpaagha ki̱ti̱i̱ni̱sa
kandi majima nkujuna boona abaku̱mpu̱ti̱yagha.”