51
Nsaala ya kusaba kughaniluwa
Ewaa mukulu wa bilimbo. Jabbu̱li̱ ya Dhau̱dhi̱, obu mulangi̱ Nasani aaghendi̱ye ewe, haanu̱ma ya Dhau̱dhi̱ ku̱syana na Batuseba.
1 Ai̱ Luhanga, ongilile kisa,
kusighikila haa kukunda kwawe kwamaani̱.
Onjiyʼo bikoluwa byanje bi̱bhi̱i̱hi̱ye,
haabwa kisa kyawe kyamaani̱.
2 Onnaabi̱ye ku̱lu̱gha mu ebi naasobeei̱ye
kandi onsemeli̱ye ku̱lu̱gha mu kibhi kyanje.
3 Nimani̱ye ngoku bikoluwa byanje bi̱bhi̱i̱hi̱ye
kandi tankuubululuwa kibhi kyanje.
4 Nuuwe kandi uwe wenkaha oghu naasi̱i̱si̱i̱ye,
naakoli̱ye kibhi mu maaso ghaawe.
Oleke bighambo byawe byoleke ngoku oli wamajima
kandi ohi̱ki̱i̱ye ku̱ntwi̱la musango mu bwengani̱ja.
5 Nkabyaluwa ndi mu̱si̱i̱si̱,
nankabha obu maaha aabaagha ananku̱li̱i̱ye, nkaba ndi mu̱si̱i̱si̱.
6 Uwe okubbalagha majima aghalu̱ghi̱ye mu muntu,
onjegheesi̱ye haa mutima ghwanje ngoku nkukola ebilimu magheji.
7 Onjiyʼo kibhi kyanje kandi nkuba muntu oghu eeli̱ye,
oonaabi̱ye kandi nkuba munjelu kusaali̱ya bilika.
8 Oleke ntodhe ndheedhuwe, okampenanga maku̱wa,
bhaatu endindi oleke ndheedhuwe.
9 Oleke kuukala ololi̱ye bibhi byanje
kandi onjiyʼo bubhi bwanje bwona.
10 Ai̱ Luhanga, ompangemu mutima ghweli̱ye
kandi ontemu mwoyo ghuhyaka oghusemeeye.
11 Otambhinga hambali oli
kandi otanjiyʼo Mwoyo waawe Ahi̱ki̱li̱i̱ye.
12 Otodhe onku̱u̱ki̱li̱ye kudheedhuwa kwa kujuna kwawe
kandi onku̱u̱ki̱yemu mwoyo ghwa ku̱ku̱hu̱ti̱ya.
13 Du̱mbi̱ nkwegheesi̱ya basi̱i̱si̱ bilaghilo byawe
kandi bakukuuka hambali oli.
14 Ai̱ Luhanga, onjune kibhi kya kwita muntu,
uwe Luhanga Mu̱ju̱ni̱ wanje,
du̱mbi̱ nkulimba ndheedheeu̱we ngoku okughanilagha.
15 Ai̱ Mukama, onjighule mi̱nu̱wa,
niikuwo kanu̱wa kanje kagubhe kukusinda.
16 Toobbali̱ye kihonguwa, nangukuhongeeye kiyo.
Bihonguwa byokeei̱ye tabi̱ku̱dheedhi̱ye.
17 Ai̱ Luhanga, kihonguwa eki obbali̱ye ni mwoyo ghu̱dhooti̱ye.
Mutima oghu̱hendeki̱ye kandi oghukwekuukaghamu, tookughubhengagha bbaa.
18 Oghilile kisa kibugha Sayu̱u̱ni̱ kandi okikoonele,
otodhe okwele bisiika bya Yelusaalemu.
19 Du̱mbi̱ okudheedhuwa haabwa bihonguwa bi̱hi̱ki̱ye bakukuhongela.
Bihonguwa byokeei̱ye bya ntu̱u̱li̱ sya nte,
ebi bakuhongela hʼeki bakuhongelaghʼo bihonguwa kyawe.