69
Kulila haabwa bu̱kooneli̱
Ewaa mukulu wa bilimbo. Jabbu̱li̱ ya Dhau̱dhi̱, kughilimba mbakoleesi̱ya elaka lya “Bimole.”
1 Ai̱ Luhanga, onjune,
nanga maasi ghampi̱ki̱ye mu bikiya.
2 Nkwete kudhikila mu bisaabo bitobheeye,
hambali ntaakugubha kukpeeta haa etaka lyomiiye.
Ndi mu maasi ghatobheeye
kandi mighina ekubbala ku̱nsendi̱ya.
3 Kukubilikila haabwa bu̱kooneli̱ kwandu̱hi̱i̱ye,
mumelo ghu̱njomi̱ye.
Maaso ghambhi̱mbhi̱ye,
haabwa kuukala mbhali̱i̱ye ndi̱ndi̱ye Luhanga wanje kunkoonela.
4 Abanjoi̱ye batali na nsonga yoona bakaniiye kimui,
kusaali̱ya muhendo ghwa esoke lyanje.
Bantu bakani̱ye ni ngi̱ghu̱ syanje kandi bakubbala
ku̱mpwelekeeleli̱ya batali na kighendeleluwa.
Bakwete kumpambi̱li̱ja ku̱ku̱u̱ki̱ya ebi ntaabhi̱ye.
5 Ai̱ Luhanga, omani̱ye budhoma bwanje.
Tankugubha ku̱ku̱bi̱si̱i̱li̱la bibhi byanje.
6 Ai̱ Mukama Luhanga waamahe,
otaleka abataaye kunihila kwabo muli uwe,
mbahemuka haabwanje.
Ai̱ Luhanga wa I̱saaleeli̱, otaleka abakwete kukubbala,
mbakwatuwa nsoni̱ haabwanje.
7 Nku̱gu̱mi̱si̱li̱jagha bantu kuunambula haabwawe
kandi nku̱u̱ghu̱wagha mpemu̱ki̱ye.
8 Nankabha baana baamaaha bakwefoolagha nga bantu abataamani̱ye,
bakuntwalikani̱yagha nga munamahanga.
9 Ku̱hu̱ti̱ya numba yaawe kwonini, kukuleka nku̱we
kandi bantu bakaakukwambulagha,
ni̱i̱si̱ye bakubaagha mbambula.
10 Nkaakulilagha kandi ninaasi̱i̱ba,
bantu batandika kuunambula.
11 Nkaaku̱lu̱waalagha bi̱lu̱waalo bya bujune,
batandika kunsekeelela.
12 Bantu bakaakusitamagha haa geeti̱ ya kibugha,
batandika ku̱mbu̱ghʼo.
Ni̱i̱si̱ye kilimbo kya batami̱i̱li̱.
13 Bhaatu si̱ye, Ai̱ Mukama, nuuwe nkusabagha.
Ai̱ Luhanga, haabwa kukunda kwawe kwamaani̱,
onkuukemu mu bwile obu weenini obbali̱ye.
Oncungule haabwa bwesighibuwa bwawe kujuna bantu.
14 Onjune kudhikila mu bisaabo.
Oncungule ku̱lu̱gha mu ngi̱ghu̱ syanje
kandi mu maasi ghatobheeye.
15 Otaleka maasi ghakusenda ngansaalila haa mutuwe eegu̱u̱li̱,
kedha maasi ghatobheeye kummela,
kedha ninkota eku̱li̱mu̱ mu kituulo.
16 Ai̱ Mukama, onkuukemu mu bulungi bwa kukunda kwawe kwamaani̱.
Onkuukʼo mu kisa kyawe kyamaani̱.
17 Oteebi̱si̱i̱li̱la mu̱heeleli̱ya waawe.
Onkuukemu bwangu, nanga nkwete kubona-bona.
18 Wiise hambali ndi kandi onjune,
ocungule ku̱lu̱gha mu ngi̱ghu̱ syanje.
19 Omani̱ye ngoku bantu bakwete kuunambula,
kumpwawaani̱ya kandi kungaya.
Omani̱ye ngi̱ghu̱ syanje syona.
20 Kuunambula kwabo kwammali̱ye maani̱
kandi kwanti̱ghi̱ye ntali na mu̱kooneli̱.
Nkubbalagha oghu akungilila kisa, bhaatu atabʼo nʼomui.
Oghu aku̱mpu̱u̱mu̱li̱ya, bhaatu tankumubonagha bbaa.
21 Bakata butuwa mu byokuliya byanje
kandi obu eliyo lyankwete, bampa vi̱i̱ni̱ esaaliiye.
22 Oleke maghenu̱ ghaabo ghabafookele kyakubakwatilʼo.
Bu̱si̱nge bwabo bubafookele ki̱ki̱ya.
23 Oleke maaso ghaabo ghaaghale niikuwo batagubha kubona.
Obagombi̱ye mighongo bilo nʼebilo.
24 Obooleke ngoku obakwatiluuwe ki̱i̱ni̱gha.
Oleke kusaakala kwawe kwamaani̱ kubahi̱kʼo.
25 Oleke maka ghaabo ghafooke bi̱hu̱ma
kandi muntu atalitodha kuukala mu weema syabo.
26 Ebo bakubona-boni̱yagha bantu aba uwe ofubiiye
kandi baakala ku̱bu̱ghʼo bantu aba uwe ohutaai̱ye.
27 Obongelaghe kifubilo haa kifubilo
kandi bataliba mu bantu baawe aba okujuna.
28 Oleke mali̱i̱na ghaabo baghalaghali̱ye mu kitabo kya bwomi̱i̱li̱.
Batahandiikuwa mu muhendo ghwa bantu bahi̱ki̱li̱i̱ye.
29 Bhaatu si̱ye niibuwo bambona-boni̱ya kandi naasaaliluwa.
Ai̱ Luhanga, ondinde kandi onjune.
30 Ndalimbagha ninsinda li̱i̱na lya Luhanga.
Ndamuhaagha ki̱ti̱i̱ni̱sa kandi ni̱mu̱si̱i̱maghe.
31 Eki kikudheedha Mukama kusaali̱ya kumuhongela nte
kandi kusaali̱ya kumuhongela ntu̱u̱li̱ ya nte eghi eli na mahembe.
32 Abakwete kubona-bona bakaakubona eki bakudheedhuwa.
Enu̱we abakubbalagha Luhanga, maani̱ ghakubakuukamu.
33 Mukama aku̱u̱ghu̱wagha abali na ebi bakwetaaghisibuwa.
Taakuubululuwagha bantu be abali mu nkomo.
34 Oleke eghulu kandi nsi bisinde Mukama,
maananja na bihanguwa ebilimu byona.
35 Luhanga akujuna bantu baa Sayu̱u̱ni̱.
Atodhe akwele bibugha bya Yu̱da.
Bantu be bakuukala mu kyalo eki,
36 na baana baabo bakitwale nga bugwetuwa bwabo
kandi abamu̱ku̱ndi̱ye niiyo baliikala.