68
Kilimbo kya bu̱si̱ngu̱li̱
Ewaa mukulu wa bilimbo. Jabbu̱li̱ ya Dhau̱dhi̱. Kilimbo.
1 Oleke Luhanga aamuke, ngi̱ghu̱ siye sihanjikane
kandi abamwohi̱ye bamuuluke.
2 Ai̱ Luhanga, obahuuhe nga mwi̱ka.
Obookeli̱ye kimui mu mulilo.
Oleke bantu babhi aba bahwelekeelele bwangu mu maaso ghaawe.
3 Bhaatu abahi̱ki̱li̱i̱ye badheedhuwe
kandi bajaghu̱je mu maaso ghaa Luhanga.
Babu̱ghe nʼelaka lyamaani̱ badheedheeu̱we.
4 Mulimbile Luhanga, mulimbe ni̱mu̱ku̱mi̱ya li̱i̱na liye.
Mulimbe nʼelaka lyamaani̱ nimusinda oghu ani̱i̱ni̱ye haa bicu.
Li̱i̱na liye niiye Mukama,
mudheedhuwe muli mu maaso ghe.
5 Luhanga oghu akuukalagha mu numba yee ehi̱ki̱li̱i̱ye.
Akuloleelelagha nku̱u̱bbi̱ kandi alinda bakwi̱si̱ya.
6 Luhanga akuhaagha maka muntu oghu ali enkaha.
Aha banyankomo bughabe kandi kudheedhuwa.
Bhaatu bajeemi̱ aleka baakala mu kyalo kyomi̱ye.
7 Ai̱ Luhanga, obu waahikiiye bantu baawe kubaaya mu ehanga lya Mi̱si̱li̱,
wabakwami̱li̱ya mu elungu,
8 nsi ekadhinga-dhinga.
Mbu̱la yaatoona mu maaso ghaawe,
Luhanga oghu akuukalagha haa mwena Si̱naai̱,
mu maaso ghaa Luhanga, Luhanga wa I̱saaleeli̱.
9 Okatooni̱ya mbu̱la ekani̱ye
kandi waaku̱u̱ki̱ya buhyaka kyalo kyawe ekyabaagha ki̱bhi̱i̱hi̱ye.
10 Ai̱ Luhanga, bantu baawe baakala mu etaka eli.
Mu bulungi bwawe okuhaagha banaku byokuliya.
11 Mukama akatʼo kilaghilo
kandi bakali̱ bakani̱ye baatwala butumuwa obu mu bi̱i̱kalo binji.
12 Bakama na mahe ghaabo niibuwo baaluka.
Bakali̱ baa Banai̱saaleeli̱ niibuwo baatambulana ebi abaali̱gi̱ti̱ye baati̱ghi̱ye.
13 Nankabha abaati̱ghaaye hambali ntaama sikuukalagha,
baatu̱ngi̱ye bya buguudha.
Bi̱i̱bbi̱mbo ebiisuuyemu siliva kandi mapapa ghaabiyo ghaasuuyemu feeja.
14 Obu Luhanga wa Bu̱toki̱ Bwona aahanjaagi̱ye bakama baa munsi,
kikaba nga bilika bighuuye haa mwena Jalu̱mooni̱.
15 Bbasaani ni mwena ghwamaani̱,
ghuli na bwena bukangamiiye kimui ku̱hi̱ka eghulu mu mwanya.
16 Haabwaki bantu abakulami̱li̱yagha haa mwena Bbasaani mbakughililagha etima,
abakulami̱li̱yagha haa mwena Sayu̱u̱ni̱ oghu Luhanga aakomi̱yemu kuukalamu?
Mukama eenini akuukala haa mwena haala bilo nʼebilo!
17 Luhanga akalu̱gha haa mwena Si̱naai̱ aasa mu ki̱i̱kalo kiye ki̱hi̱ki̱li̱i̱ye.
Mukama ali na baasilikale abakulwanagha bani̱i̱ni̱ye haa bigaali̱ bikaniiye kimui.
18 Okani̱i̱na kusaala hambali mwanya ghuheleeye,
ohikiiye aba bakwete haa bulemo.
Waatunga bisembo ku̱lu̱gha mu bantu nankabha mu bajeemi̱ye,
ngoku Mukama Luhanga aakaaye mu ki̱i̱kalo eki.
19 Mu̱si̱i̱me Mukama oghu akuheekagha nku̱mba syatu bu̱li̱ kilo,
niiye Luhanga oghu akutujunagha.
20 Luhanga waatu ni Luhanga oghu akujunagha.
Mukama Luhanga niiye akucungulagha bantu ku̱lu̱gha mu lu̱ku̱.
21 Majima Luhanga akukpeetaagula mituwe ya ngi̱ghu̱ siye
kandi buhanga bwa abakuukalagha mbasi̱i̱sa.
22 Mukama akughilagha ati, “Nku̱ku̱u̱ki̱ya ngi̱ghu̱ syanu ku̱lu̱gha Bbasaani.
Nkubaku̱u̱ki̱ya kubaaya mu nanja hambali atobheeye.
23 Enu̱we bantu banje mukunaaba mu maghulu ghaanu saghama yabo.
Kandi mbuwa syanu siliye maku̱wa ghaabo.”
24 Ai̱ Luhanga, bantu boona baboone kulubhatanga kwawe mu bu̱si̱ngu̱li̱.
Kughenda kwa Luhanga wanje kandi Mukama wanje, mu ki̱i̱kalo kiye ki̱hi̱ki̱li̱i̱ye.
25 Abakwete kulimba bamuhikiiye.
Bali̱mbi̱ baamu̱ti̱ghala enu̱ma,
haagati yabo haliyo baana baabukali̱ abakwete kuteela buuciki-ciki.
26 “Enu̱we bantu baa I̱saaleeli̱, mu̱si̱i̱me Luhanga mu kusanga-sangaana kwanu.
Musinde Mukama oghu ali ntandiko ya bwomi̱i̱li̱ bwanu.”
27 Mulole, bantu baa ntu̱la nkee ya Bbenjami̱i̱ni̱ niibo bahikiiye.
Aalabhʼo balemi̱ baa ntu̱la ekani̱ye ya Yu̱da.
Aalabhʼo balemi̱ boona baa ntu̱la ya Jabbu̱looni̱ na Nafutaali.
28 Ai̱ Luhanga, wooleke maani̱ ghaawe,
maani̱ agha waakoleeseei̱ye haabwatu.
29 Ku̱lu̱gha mu numba yaawe Yelusaalemu,
hambali bakama bakukuleetelagha bisembo.
30 Ofubile binyama byʼomu kisaka ebikuukalagha mu bikaaka.
Ofubile mahanga agha bakama baaghʼo
kandi bantu baaghʼo bali nga bisolo byʼomu kisaka.
Oleke baase ewaawe mbagu̱lu̱ma baleeti̱ye bisembo bya siliva.
Ohanjaage mahanga aghakubbalagha kuukala ngaleetʼo bulemo.
31 Batumuwa baku̱lu̱gha Mi̱si̱li̱
kandi bantu bʼomu ehanga lya Eti̱yopi̱ya,
bakusaba nsaala ewaawe baamu̱ki̱i̱ye mikono.
32 Mulimbile Luhanga, enu̱we makama aghali munsi,
mulimbe nimusinda Mukama.
33 Mulimbile oghu ani̱i̱ni̱ye haa eghulu, eghulu lya hambele.
Mu̱u̱ghu̱we elaka liye lyamaani̱ elikwete ku̱lu̱gha mu mwanya.
34 Mulangilile maani̱ ghaa Luhanga, oghu ali na ki̱ti̱i̱ni̱sa mu I̱saaleeli̱
kandi oghu ali na bu̱toki̱ mu eghulu.
35 Ai̱ Luhanga, bantu bakwobaagha okaakubaagha oli mu ki̱i̱kalo kyawe ki̱hi̱ki̱li̱i̱ye.
Luhanga wa I̱saaleeli̱ niiye akuhaagha maani̱
kandi agu̱mi̱ya bantu be.
Luhanga asi̱i̱mu̱we!