71
Nsaala ya muntu mukulu
1 Ai̱ Mukama, nuuwe buulukilo bwanje,
otaleka nimpemuka.
2 Onjune haabwa bu̱hi̱ki̱li̱i̱le bwawe.
Ontegheeleli̱ye na kutui kwawe kandi onjune!
3 Obe kikuka kyanje kya kuulukilamu,
hambali ndaghendagha.
Onjune haabwa kilaghilo kyawe,
nanga nuuwe kikuka kyanje kandi kigho kyanje.
4 Ai̱ Luhanga wanje, onjune ku̱lu̱gha mu mikono ya bantu babhi,
onjune bantu abatali na bwengani̱ja kandi basaakaaye aba.
5 Ai̱ Mukama nuuwe kunihila kwanje,
Mukama, nkakwesigha ku̱lu̱gha ninali mwana.
6 Nkakwesighikilʼo mu bwomi̱i̱li̱ bwanje bwona,
okandinda ku̱lu̱gha haa kilo eki naabyaluuwemu.
Nkuukala niinakusinda.
7 Bwomi̱i̱li̱ bwanje bwabaaye kyakulolelʼo kya bantu bakani̱ye,
nanga nuuwe buulukilo bwanje bwamaani̱.
8 Nkuukalagha ninkusinda na kanu̱wa kanje
kandi mmala kilo kyona nindangilila ki̱ti̱i̱ni̱sa kyawe.
9 Nankabha endindi ndi muntu mukulu, gutu otambhenga.
Otandu̱ghʼo nankabha maani̱ ghampooye.
10 Ngi̱ghu̱ syanje niibuwo bambu̱ghʼo kubhi.
Bakwete kuhanuula hamui kahanda kaa kunjitilamu.
11 Bakughilagha bati, “Luhanga aamu̱lu̱ghi̱yʼo,
oleke tumuhume kandi tumukwate,
nanga taaliyo oghu akumujuna.”
12 Ai̱ Luhanga, otaakala onseli̱yʼo,
Luhanga wanje, wiise bwangu kunkoonela.
13 Oleke abakwete kunyegheelela bahemuke kandi bahwelekeelele.
Oleke abakubbala kunkola kubhi
babasekeelele kandi baswajibuwe.
14 Si̱ye ndaakalagha ntaaye kunihila kwanje muli uwe,
nkweyongela kuukala niinakusinda.
15 Nkuukala niinabu̱gha na kanu̱wa kanje haa bu̱hi̱ki̱li̱i̱le bwawe.
Ndamalagha kilo kyona niinaghambila bantu ngoku okubajunagha,
nankabha kusaai̱ye ngoku nkugubha ku̱kwetegheeleli̱ya.
16 Ai̱ Mukama Luhanga, ndaakalagha niinaasu̱ki̱ya bantu ngoku okukolagha bintu byamaani̱.
Ndabaghambilagha ngoku uwe wenkaha aanuuwe ohi̱ki̱li̱i̱ye.
17 Ai̱ Luhanga, okanjegheesi̱ya ku̱lu̱gha ninali mwana.
Tankulekeelela kughambila bantu haa bikoluwa byawe byakuswekani̱ya.
18 Ai̱ Luhanga, otandu̱ghʼo nankabha nkaakuuye kandi ntooye mbu̱i̱.
Oleke ngambile mujo oghukwisa haa bu̱toki̱ bwawe bwamaani̱.
19 Ai̱ Luhanga, bu̱hi̱ki̱li̱i̱le bwawe,
bu̱hi̱ki̱ye eghulu mu mwanya.
Okukolagha bintu byamaani̱
kandi taaliyo oghu akwengaane.
20 Okaleka si̱ye naatunga bijibu kandi naabona-bona.
Okutodha ku̱nku̱u̱ki̱liya bwomi̱i̱li̱ bwanje.
Okunjiya eku̱li̱mu̱ kandi otodhe ompe bwomi̱i̱li̱.
21 Majima okunfoola wamaani̱
kandi otodhe ompu̱u̱mu̱li̱ye.
22 Ai̱ Luhanga wanje, nkukusinda ninteela du̱ngu̱ yanje
haabwa bwesighibuwa bwawe.
Ai̱ Luhanga Ahi̱ki̱li̱i̱ye wa I̱saaleeli̱,
nkulimba ninkusinda ninteela li̱kembe lyanje.
23 Nkulimba na kanu̱wa kanje ni̱nkoleesi̱ya elaka lyamaani̱ lyakudheedhuwa,
obu nkuba nindimba kukusinda,
si̱ye oghu waacunguuye.
24 Ndamalagha kilo kyona nindangilila bantu bikoluwa byawe bya bu̱hi̱ki̱li̱i̱le,
nanga abaabbalagha kunkola kubhi okabahemula kandi waabaswaja.