72
Nsaala ewaa Luhanga kukoonela mukama
Jabbu̱li̱ ya Solomooni̱.
1 Ai̱ Luhanga, wooleke mukama waatu bwengani̱ja bwawe
kandi weegheesi̱ye mukama waatu bu̱hi̱ki̱li̱i̱le bwawe.
2 Omukoonele ku̱twi̱la bantu baawe misango mu mulingo ghu̱hi̱ki̱ye
kandi aleme banaku mu bwengani̱ja.
3 Oleke bantu abaakaaye haa myena kandi bwena,
bakula-kulane kandi babe bahi̱ki̱li̱i̱ye.
4 Okoonele mukama kulwanilila banaku,
kucungula baana baa bantu abali mu bwetaagho
kandi kukpeetaagula abakubabona-boni̱yagha.
5 Oleke ahangaale bilo nʼebilo,
nga musana kandi kweli̱.
6 Oleke mukama oghu abe nga mbu̱la ekwete kutoona mu misili
kandi nga maasi ghali haa etaka.
7 Mu bwile obu akumala analemi̱ye oleke bantu beeyongele kuba bahi̱ki̱li̱i̱ye,
bakula-kulane kandi habʼo mpempa ku̱hi̱ki̱ya obu kweli̱ kulihuwʼo.
8 Oleke aleme ku̱lu̱gha haa nanja ku̱hi̱ka haa nanja,
ku̱lu̱gha haa maasi Efulaati̱ ku̱hi̱ka hambali nsi eheleeye.
9 Bantu abali mu elungu bateeli̱ye mu maaso ghe
kandi ngi̱ghu̱ siye bamu̱teeleli̱ye balambile tu̱u̱tu̱.
10 Bakama bʼomu ehanga lya Talasi̱i̱si̱ kandi na mahanga ghaseli̱ye,
bamuhe musolo.
Bakama baa Sebba na Seba
bamuleetele bisembo.
11 Bakama boona bateeli̱ye mu maaso ghe
kandi na bantu bʼomu mahanga ghoona bamu̱heeleli̱ye.
12 Akucungula abali mu bwetaagho abakumubilikila,
akoonele banaku kandi bantu abatali na mu̱kooneli̱.
13 Akughilila kisa baceke kandi na bantu abali mu bwetaagho
kandi ajune bwomi̱i̱li̱ bwabo.
14 Akubacungula mu bakwete kubabona-boni̱ya kandi abakubaleeteleja butabanguko,
nanga bwomi̱i̱li̱ bwabo akububonagha nga kintu kya muhendo.
15 Mukama oghu ahangaale!
Oleke bantu bʼomu Sebba bamuhe feeja,
oleke bantu bamusabilaghe bwile bwona.
Baamalaghe kilo kyona mbanamuha mi̱gi̱sa.
16 Oleke ehanga liye libe na byokuliya bikani̱ye
kandi haa myena eegu̱u̱li̱ hoona byokuliya biisulʼo.
Oleke habemu byokuliya nga bya Lebbanooni̱
kandi bantu be bakane nga bi̱si̱ngo byʼomu misili.
17 Li̱i̱na liye lihangaale bilo nʼebilo,
ku̱hi̱ki̱ya obu musana ghulihuwʼo.
Oleke mahanga ghoona ghatunge mu̱gi̱sa kukwama mu eye
kandi bamughilaghemu wa mu̱gi̱sa.
18 Mu̱si̱i̱me Mukama, Luhanga wa I̱saaleeli̱,
oghu enkaha akukolagha byakuswekani̱ya.
19 Mu̱si̱i̱me li̱i̱na liye lya ki̱ti̱i̱ni̱sa bilo nʼebilo!
Oleke nsi yoona eesulemu ki̱ti̱i̱ni̱sa kiye.
Aami̱i̱na kandi Aami̱i̱na!
20 Kuni niikuwo kumaliilila kwa nsaala sya Dhau̱dhi̱, mutabani̱ wa Yese.