KITABO KYAKASATU
73
(Jabbu̱li̱ 73—89)
Bwengani̱ja bwa Luhanga
Jabbu̱li̱ ya Asafu.
1 Majima Mukama akukolelagha Banai̱saaleeli̱ bilungi,
abali na mitima esemeeye.
2 Bhaatu si̱ye, bighele byanje bikaba bili haai kutelebuka.
Nkaba ndi haai ku̱lu̱gha haa ku̱hi̱ki̱li̱ja kwanje,
3 nanga nkaghilila etima bantu abali na myepanko,
obu naaboone bantu babhi aba mbakula-kulana.
4 Tabakubaagha na bijibu,
bakuukalagha bali boomi̱i̱li̱ kandi bali na maani̱.
5 Tabakubona-bonagha nga bantu banji
kandi tabakubaagha na bijibu nga bu̱li̱ muntu.
6 Nahabweki myepanko yabo eli nga kakwanji balu̱wete mu bikiya.
Butabanguko bubaasuuyemu nga ngoye balu̱wete.
7 Bisabu bibabhi̱mbi̱i̱ye maaso,
mitima yabo eesuuyemu byeli̱li̱kano bi̱bhi̱i̱hi̱ye.
8 Bakusekeelelagha bantu banji kandi babu̱gha bintu bi̱bhi̱i̱hi̱ye.
Bali na myepanko kandi bakuteghekagha kubona-boni̱ya bantu banji.
9 Baku̱bu̱ghaghʼo kubhi Luhanga oghu ali mu eghulu,
balaghila bantu baa munsi basakaaye.
10 Nankabha bantu aba basaakaaye batiyo,
bakutungagha bakwami̱li̱li̱ bakani̱ye,
abaku̱si̱i̱magha ebi bakwete ku̱bu̱gha.
11 Bantu babhi aba bakughilagha bati, “Luhanga akumanya ati̱ya?
Luhanga wa Eghulu Munu amani̱ye ebikwete kubʼo?”
12 Mulole bantu babhi aba,
bakuukalagha bali kusemeeye
kandi buguudha bwabo mbuneeyongela.
13 Nkaluhila busa kuukala ndi na mutima ghusemeeye
kandi kwelinda ngalo syanje kutakola kintu ki̱bhi̱i̱hi̱ye.
14 Nkubona-bonagha kilo kyona
kandi okunfubilagha bu̱li̱ nkyambisi.
15 Nguli naabu̱ghi̱ye bintu bi̱bhi̱i̱hi̱ye nga ebi,
nangubaaye ntali wamajima mu bantu baawe.
16 Nkalengʼo kwetegheeleli̱ya ekikulekagha bantu babhi bakula-kulana,
bhaatu kyantimbiikilana,
17 ku̱hi̱ki̱ya obu naaghendi̱ye mu numba yaawe ehi̱ki̱li̱i̱ye.
Neetegheeleli̱ya ebikubʼo bantu babhi aba.
18 Majima okubata mu ki̱i̱kalo kiteleeye
kandi bakwegenga baku̱we.
19 Okubahwelekeeleli̱ya bwangu
kandi obamalʼo na kubona-bona kwamaani̱.
20 Ai̱ Mukama, bakubaabululuwa nga ndooti̱ eghi muntu akulootagha.
Naamuka nkyambisi aghiibululuwa.
21 Bwile bumui nkaaghu̱wa ntamu̱u̱we
kandi mutima ghunsaaliiye munda.
22 Nkaba mudhoma kandi oghu ateetegheleei̱ye,
neetwalikani̱ya nga kisolo mu maaso ghaawe.
23 Bhaatu tanaku̱lu̱ghi̱yʼo
kandi wankwata haa mukono ghwabuliyo.
24 Okumpabulagha na magheji ghaawe,
niikuwo haanu̱ma ontwale mu ki̱ti̱i̱ni̱sa.
25 Mu eghulu nuuwe ndi naawe wenkaha.
Munsi nuuwe wenkaha nkwete kubbala.
26 Mutima kandi mubili ghwanje bikugubha kuceka.
Bhaatu Luhanga niiye maani̱ ghaa mutima ghwanje kandi ni wanje bilo nʼebilo.
27 Abaku̱seli̱yʼo bakuhwelekeelela.
Abatakwesi̱ghi̱ye okubamalʼo.
28 Bhaatu si̱ye, nkilungi kuukala haai-haai naawe Luhanga.
Mukama Luhanga, nuuwe buulukilo bwanje.
Nkughambila bantu banji ebi okukolagha byona.