74
Nsaala ya kusabila ehanga
Jabbu̱li̱ ya Asafu.
1 Ai̱ Luhanga, waatu̱bhengi̱ye bilo nʼebilo nangaaki?
Haabwaki okwatiluuwe ki̱i̱ni̱gha kyamaani̱,
ntaama syʼomu eli̱i̱si̱li̱yo lyawe?
2 Oosuke bantu baawe,
aba waakomi̱yemu hambele.
Aba waacunguuye mu bu̱syana kuba ntu̱la yaawe.
Oosuke mwena Sayu̱u̱ni̱ hambali okuukalagha.
3 Olubhatange kandi olole ebyabhi̱hi̱i̱ye.
Ngi̱ghu̱ syatu syahwelekeleei̱ye,
bu̱li̱ kintu kyona ekili mu numba yaawe ehi̱ki̱li̱i̱ye.
4 Ngi̱ghu̱ syawe niibuwo baagola mu numba yaawe.
Baasi̱mbi̱yemu bhendela syabo nga kabonelo kaa bu̱si̱ngu̱li̱.
5 Bakwete kujomba bintu byamu,
nga bantu abakwete ndyankui kujomba biti mu ki̱bhi̱li̱.
6 Bakwete ku̱bhi̱i̱ya njighi syamu sya mbaau,
mbakoleesi̱ya ndyankui kandi nondo.
7 Bookeehi̱ye numba yaawe ehi̱ki̱li̱i̱ye yeegenga hansi.
Baabhi̱i̱hi̱li̱ya kimui ki̱i̱kalo kyawe,
hambali bantu baakulami̱li̱yagha li̱i̱na lyawe.
8 Niibuwo baaghambilana bati,
“Tukubakpeetaagula boona.”
Bookeehi̱ye malami̱li̱yo ghaa Luhanga ghoona aghali munsi.
9 Tatukyabona kyakuswekani̱ya,
taakyaliyo mulangi̱ nʼomui oghu ati̱ghaayʼo.
Taaliyo oghu amani̱ye hambali kini kikuhelela.
10 Ai̱ Luhanga, ngi̱ghu̱ syatu si̱ku̱hi̱ki̱ya haa kutusekeelela?
Buuye bakuukala mbanambula li̱i̱na lyawe bilo nʼebilo?
11 Ekyaleki̱ye waata enu̱ma mukono ghwawe ghwabuliyo nkiki?
Oghuuye mu kiigandulo kyawe obahwelekeeleli̱ye!
12 Ai̱ Luhanga, nuuwe Mukama wanje ku̱lu̱gha hambele.
Okujunagha bantu munsi muni.
13 Okaati̱yamu nanja kabili haabwa bu̱toki̱ bwawe.
Waakpeetaagula mituwe ya biyoka biinamu̱li̱to byʼomu nanja.
14 Nuuwe okakpeetaagula mituwe ya biyoka ebi.
Waabiha binyama bya mu elungu kubiliya.
15 Okaleka nsulo kandi biijulumba byabʼo
kandi woomi̱ya maasi ghakusenda.
16 Okahanga ntangaali̱ kandi mukilo,
waata musana kandi kweli̱ mu bi̱i̱kalo byabiyo.
17 Nuuwe okatʼo mitaano ya nsi.
Waatʼo bwile bwa musana kandi mbu̱la.
18 Ai̱ Mukama, olole ngoku ngi̱ghu̱ syawe bakwete kukusekeelela.
Bantu badhoma niibuwo bambula li̱i̱na lyawe.
19 Otaleka bantu baawe abatali na bu̱kooneli̱,
mu ngi̱ghu̱ syabo esisaakaaye.
Otaabululuwa bantu baawe,
aba bakwete kubona-boni̱ya.
20 Oosuke ndaghaano eghi waakoli̱ye naatu,
nanga munsi haasuuyemu mweli̱ma kandi butabanguko.
21 Otaleka aba bakwete kubona-boni̱ya mbahemuka.
Oleke banaku na abali mu bwetaagho bakusinde.
22 Ai̱ Luhanga, oomuke weelwanilile.
Oosuke ngoku bantu badhoma,
bakumalagha kilo kyona,
mbanakusekeelela.
23 Otaabululuwa ebi ngi̱ghu̱ syawe baku̱bu̱ghagha.
Bakuukalagha mbagola basaaluuwe.