75
Luhanga mu̱cu̱ wa misango
Ewaa mukulu wa bilimbo. Kusighikila haa “Otahwekeeleli̱ya.” Jabbu̱li̱ ya Asafu. Kilimbo.
1 Ai̱ Luhanga, niibuwo twaku̱si̱i̱ma,
nanga oli haai-haai naatu.
Bantu hoona-hoona baku̱bu̱ghagha,
byakuswekani̱ya ebi okukolagha.
2 Luhanga akughilagha ati, “Naataayʼo bwile obu nku̱twi̱la bantu musango.
Nku̱ghu̱twi̱la mu bwengani̱ja.
3 Nankabha nsi edhinga-dhinga
kandi bihanguwa ebilimu byona bitukumila,
nkuukala ninagu̱mi̱i̱ye misingi yayo.
4 Nkughilagha abakwete kwebhi̱mba-bhi̱mbi̱ya nti, ‘Muleke kwepanka!’ ”
Bantu babhi nti, “Muleke kweku̱li̱li̱ja haabwa maani̱ ghaanu!
5 Muleke kwepanka
kandi muleke kughambila bantu ngoku muli baamaani̱.”
6 Bu̱si̱ngu̱li̱ tabu̱ku̱lu̱ghagha bu̱lu̱gha ejooba,
kedha bughuwa ejooba, kedha mu elungu.
7 Mu̱cu̱ wa misango ni Luhanga,
niiye akuuyaghʼo bantu bu̱toki̱ kandi abuha bantu banji.
8 Mukama akwete mu ngalo kiikopo.
Kiisuuyemu vi̱i̱ni̱ esaaliiye ya ki̱i̱ni̱gha kiye.
Akughiseesagha kandi bantu babhi boona baghinuwa.
Bakughinuwaagha baghimalilamu kimui.
9 Bhaatu si̱ye nkuukala niinalangilila ebi Luhanga akukolagha.
Nkuukala niinalimba bya kusinda Luhanga wa Yakobbo.
10 Luhanga akughilagha ati, “Nkumala maani̱ bantu babhi,
bhaatu nongele bu̱toki̱ bantu bahi̱ki̱li̱i̱ye.”