76
Luhanga mu̱si̱ngu̱li̱
Ewaa mukulu wa bilimbo, naakoleesi̱ya du̱ngu̱. Jabbu̱li̱ ya Asafu. Kilimbo.
1 Bantu baa Yu̱da bamani̱ye Luhanga,
li̱i̱na liye ndyamaani̱ mu I̱saaleeli̱.
2 Ka yee eli Yelusaalemu*76:2 Bbai̱bbu̱li̱ sinji sighambi̱ye Saleemu li̱i̱na likulu lya Yelusaalemu.
kandi akuukalagha haa mwena Sayu̱u̱ni̱.
3 Eghi niiyo aabheghangiiye bimala bikwakʼo mulilo bya ngi̱ghu̱ siye,
ngabo syabo, na bihiyo bakulwani̱i̱si̱yagha haa bulemo.
4 Ai̱ Luhanga, oli na ki̱ti̱i̱ni̱sa
kandi bu̱soboli̱ kusaali̱ya myena eghi ekuukalaghʼo bilo byona.
5 Baasilikale baamaani̱ baa ngi̱ghu̱ syawe bakabaata.
Baatwala bu̱li̱ kintu eki baabaagha nakiyo.
Bakaku̱wa, nahabweki tabakugubha kutodha ku̱koleesi̱ya,
byakulwani̱i̱si̱ya byabo.
6 Ai̱ Luhanga wa Yakobbo, obu weetanu̱ki̱ye,
byombi nkai̱na nʼoghu aghi̱ni̱i̱ni̱yʼo byegenga bi̱ku̱u̱ye.
7 Uwe wenkaha nuuwe bantu babhonganuuwe kwobaha.
Nuwaasaaluuwe, taaliyo oghu akugubha kwemilila mu maaso ghaawe.
8 Okatwi̱la ngi̱ghu̱ syawe musango ku̱lu̱gha mu eghulu.
Nsi yoobaha kandi yaaholi̱ya.
9 Ai̱ Luhanga, okaamilila ku̱twi̱la bantu babhi musango.
Waajuna abakwete kubona-bona munsi.
10 Ki̱i̱ni̱gha kya bantu kikukusindagha.
Abakukila ki̱i̱ni̱gha eki, bakuukala mbajaghuja.
11 Muhe Mukama Luhanga waanu ebi mwamulaghi̱i̱sani̱i̱ye.
Mumuleetele bisembo, enu̱we boona mahanga aghali haai-haai.
Niiye Luhanga oghu bantu babhonganuuwe ku̱hu̱ti̱ya.
12 Aku̱dhooti̱yagha balemi̱ baa myepanko
kandi aleka bakama baa munsi boobaha.