77
Kuusuka Luhanga mu bwile bwa bijibu
Ewaa mukulu wa bilimbo. Kusighikila haa Yedu̱tu̱u̱ni̱. Jabbu̱li̱ ya Asafu.
1 Nkusabagha Luhanga nʼelaka lyamaani̱.
Ntakangana ewaa Luhanga, niikuwo anji̱ghu̱we.
2 Mu bwile bwa kijibu kyanje,
nkusabagha Mukama.
Nkumalagha mukilo yoona ni̱i̱mu̱ki̱i̱ye mikono ninsaba.
Tankutungagha oghu aku̱mpu̱u̱mu̱li̱ya.
3 Ai̱ Luhanga, nkaakuukusukagha nkulilagha.
Nkaaku̱kweli̱li̱kanaghʼo,
nkwehi̱ghu̱wagha maani̱ ghampooye.
4 Okulekagha ndaala mbhali̱i̱ye mukilo yoona.
Ni̱i̱ghu̱wa noobahi̱ye kandi ntaakugubha ku̱bu̱gha.
5 Nkuusukagha bilo ebyasaaye
kandi na myaka ya hambele.
6 Nkumalagha mukilo yoona ni̱i̱neeli̱li̱kana.
Ni̱i̱neebu̱u̱li̱ya haa mutima nti,
7 “Mukama akuukala anatu̱bhengi̱ye?
Taakutodha kudheedhuwa haabwatu?
8 Aaleki̱ye kutwoleka kukunda kuwe kwamaani̱?
Taakutukolela ebi aatulaghi̱i̱sani̱i̱ye?
9 Luhanga aabuluuwe kutughilila ngughuma?
Aatukwatiluuwe ki̱i̱ni̱gha mu ki̱i̱kalo kya kisa?”
10 Du̱mbi̱ naaghila nti, “Ekinsaaliiye kwonini ni ngu,
Luhanga wa Eghulu Munu taakyali na bu̱toki̱.”
11 Mukama, nkuusukagha ebi waakoli̱ye.
Nkuusukagha byakuswekani̱ya byawe bya hambale.
12 Nkweli̱li̱kanaghʼo milimo yaawe yoona
kandi nkuteekelejaghʼo ebi waakoli̱ye.
13 Ai̱ Luhanga okukolagha ebi̱hi̱ki̱li̱i̱ye,
taaliyo luhanga onji oghu akwengaane.
14 Nuuwe Luhanga oghu akukolagha byakuswekani̱ya.
Okwolekagha maani̱ ghaawe mu mahanga ghoona.
15 Haabwa mukono ghwawe ghwamaani̱ okacungula bantu baawe,
baasukulu baa Yakobbo na Yojeefu̱.
16 Ai̱ Luhanga, obu maasi ghaakuboone, ghoobaha.
Ghaatandika kutukumila ku̱lu̱gha hansi yagho.
17 Bicu byatooni̱ya mbu̱la,
nkubha yeetanuka ku̱lu̱gha mu mwanya.
Kubbyoka kwayo kwalu̱gha mpande syona.
18 Elaka lya nkubha eghi lyaba nga ki̱ku̱ku̱mo kya kyegha.
Kubbyoka oku kwamu̱ki̱ya eghulu,
ti̱ nsi yaatandika kutukumila kandi kudhinga-dhinga.
19 Waaleka kihanda kyaba mu nanja.
Waakwamila mu maasi ghaanamu̱li̱to,
bhaatu maki̱nde ghaawe ghataaboneka.
20 Waahikila bantu baawe nga mu̱li̱i̱si̱ya,
nookoleesi̱ya Musa na Alooni̱.